登龍街舖靚價仲靚
近幾年唔少歐美大型時尚品牌都落戶港島銅鑼灣，加上區內將有大型商場及商廈綜合項目會喺暑假開幕，該區零售消費前景一片光明。
其實近年好多財團喺區內尋寶，其中屬區內明日之星的登龍街，呢幾年有唔少收購，而登龍街2號大利行剛以近6億元全幢售出，物業近七年升值逾兩倍。
有地產老友畀份土地註冊處登記劉Sir睇，登龍街2號大利行於上月登記以5.98億元轉售，買家係MAY MAGIC TRADING LIMITED，而公司註冊處冇呢間公司登記；據悉，該幢物業樓高20幾層，總樓面超過4萬方呎，依家圍晒板做緊工程。
租戶財團爭相吸納
據土地註冊處文件，上址原業主高添集團有限公司，喺○五年五月以1.9億元購入，升值逾兩倍；據公司註冊處資料，公司董事包括陳澤儒及陳韻雲，地址係上環信德中心西翼中層戶，同永傑集團一樣。
銅鑼灣一線街零售商戶日趨國際化，知名租戶都肯花錢搶租龍頭舖，唔少財團都睇準區內零售市場，所以喺區內吸納具升值潛力物業，除上址外，資本策略地產（00497）喺前年已經買咗伊榮街1至5號全幢酒店，諗住重新發展為銀座式商廈。
物流張摸售套二億
受惠起動九龍東，九龍城未來零售前景亦不容忽視，資深投資者「物流張」一早喺舊年底以1.8億元，向新世界（00017）買咗太子滙成個零售部分，近幾日已先後火速摸出幾個地舖及一樓全層，套現近2.2億元，帳面已經賺凸近3,900萬元，未計最後一個地舖，目前叫價近3,000萬元，已有兩個客傾到尾聲。
而資深投資者羅家寶嘅東海商業中心地下部分及地庫部分，聽講有個飲食集團諗住出約1.05億元打動業主割愛。
近年銅鑼灣主要商用物業收購情況
物業 成交價 備註
登龍街2號 5.98億元 原業主公司董事包括永傑集團陳澤儒等
渣甸街66號全幢 2.80億元 投資者吳鎮科將上址及毗連60至64號，一併重建酒店
伊榮街1至5號全幢 5.48億元 資本策略擬重新發展為銀座式商廈
耀華街32至40號全幢 3.32億元 樓下低層作零售用途，樓上為寫字樓
登龍街2號樓高二十多層，剛以近六億元全幢售出。