Fundman睇市：平保等業績執平貨

歐元區財長單方面取消向希臘發放援助金的會議，倒過來輪到大批國債即將到期的希臘着急，希臘財長斥歐盟「玩火」，其實希臘同歐盟過招，不止一次，上任總理帕潘德里歐炮製公投威嚇要等人民決定是否留在歐元區，最後斷送政治前途。歐元財長今次玩返希臘，為啖氣之外，可能真係有想過，應唔應該再為一粒老鼠屎，搞「禍」成煲粥。

早兩日意大利及匈牙利拍債反應唔錯，金融機構心底裏都預備本月底，歐盟推二輪長期再融資操作（LTRO）再有平錢可借，買歐豬債賺息差。但美國兩輪QE威力一次細過一次，打嗎啡止痛並非治本之法。匯市及長債市的取向，明顯同準備掃入短豬債，食個免費午餐唔同。近幾日意大利十年國債息，從上星期的五個月低位5.5厘上返5.87厘，歐元兌美元由1.33退守1.30水平。環球股市近一星期仲興高采烈，預早慶祝二輪LTRO再放水過萬億歐元，到底係匯商與長債持有人睇錯市，抑或先知先覺，月底LTRO規模水落石出時就會知答案。筆者認為大市升到十個月高位，低位買貨的應該酌量減磅。

港股抗跌力勝一籌

前日急升447點之後，儘管外圍腳軟，但港股埋單計數只係跌87點，報21,277點，只係嘔返前日五分之一升幅，強勢得很。銀行年初水頭充足，再有銀行下調按息，工銀亞洲將最優惠利率按揭息率，由原來P-2.5厘降至P-2.85厘，不過地產股近期升咗唔少，一線地產股得新地（00016）仲有一個位進帳，收118.8元，反而資金轉去二線地產及收租股，九倉（00004）升0.65元報48.25元，新世界（00017）升0.22元報10.02元，中線筆者仲係傾向等一線股回吐，會比買二線股優勝。

舊年聖誕前後，史提芬以A股估值處歷史低位，內地CPI快將回落，銀根有轉鬆的可能，建議看官們博反彈首選保險股，不負所託，兩隻心水平保（02318）及新華保險（01336）分別由低位最多反彈過42.2%及55.8%，尤其華保，近期開始多了機構投資者賭其可能入MSCI，加上華保本身是多隻內地保險股中，較A股折讓最多的一員，極有機會後來居上，結果也不負所望。假如低位上車，建議係時候考慮先減磅，至少把一半獲利貨鎖定利潤。

習近平訪美自然要帶禮物，剛公布的對外資開放內地機動車交通事故責任強制保險，由目前交險寡頭壟斷局面睇，短期影響是心理大於實際。反而平保公布一月份保費收入升16%，超出分析員估計，也跑贏太保（02601）的4%一條街，股價尋日仲係停滯不前，成交開始愈玩愈縮，似乎65至67元之間阻力唔細。

三月底保險股成績表曝光，市場預測平保盈利197.9億元（人民幣．下同），較一○年的173億元升14.3%，以首三季業績145.19億計，換句話說，第四季要交出52.7億，比首三季的平均每季48.4億多8.8%，由於第四季保費增長疲弱，期內A股走勢又每況愈下，投資收入勢被拖低，業績較預測差的風險唔細，估計成績表面世時，或會是捧場客另一入貨機會。