樓市回春九龍最温暖

冰封多時嘅樓市終於喺今個月回春，外圍形勢好轉，股市回升，購買力突然釋放，從地產代理數據睇到，二月份上半個月全港50個指標屋苑錄852宗買賣個案，成交量比一月同期281宗爆升兩倍，係舊年二月以嚟嘅半月成交新高。

春節後，二手交投重上升軌，利嘉閣嘅數據顯示，上半個月，港島、九龍及新界三區二手交投全線向上，當中以九龍區表現最搶鏡，該區20個指標屋苑喺上半月累錄341宗成交，比一月同期100宗，激增2.41倍；新界21個指標屋苑同港島9個指標屋苑，就錄398宗同113宗成交，成交量按月多咗1.86倍與1.69倍。

維港灣買賣增13倍

而50個指標屋苑中，有48個屋苑嘅成交量喺上半個月錄得升幅，佔比率高達96%，當中有40個屋苑增幅最少一倍，好似一月份上半個月只係錄得1宗成交嘅奧運站維港灣同沙田中心，今個月上半月就有14宗同13宗成交，升幅更高達13倍同12倍，升幅相當驚人。而紅磡海逸豪園、長沙灣宇晴軒同荃灣中心，交投量都升咗7倍、6.5倍同逾5倍。

德福價彈8% 嘉湖報升

除咗交投急升之外，個別屋苑樓價亦都出現止跌回升迹象，尤其係細價單位為主嘅屋苑，情況更加明顯。

好似九龍灣德福花園上半月錄到22宗成交，平均呎價6,361元，對比一月同期平均呎價5,886元，升咗8.1%；天水圍嘉湖山莊平均呎價3,198元，按月升咗4%。

利嘉閣地產總裁廖偉強同劉Sir講，今次旺市正好係確認出樓市正式回春，絕對唔係一般季節性嘅小陽春，後市亦將會漸入佳境，至於下半月尚餘日子雖然比較少，但估計交投量仍然可以同上半月睇齊，而樓價跌勢更加有望告終。