股海實戰：美聯收入水漲船高

情人節講金唔講心，大批市民周日開始企街，為嘅係爭購中國銀行百年華誕紀念鈔，墟冚情況令阿莊腦海浮現當年紅籌股熱大批投資者排隊認購北控（00392）IPO嘅熱鬧場面，可惜如今股市熱潮不再，依家為咗執幾百蚊要排成晚都爭崩頭，反映今時今日搵食真係好唔容易！

唔知係咪好多太太兵團去咗做排隊黨，尋日落魚缸撳機嘅人都少咗，反正恒指成日波幅都係得嗰百幾點，多個熱炒板塊都見回吐，排隊買紀念鈔賺硬落袋顯得更有為！本周初阿莊話，若然大市要再抽高，香港地產股有炒落後條件，果真如是，尋日地產股成表現最突出嘅板塊，新地（00016）升3.5%、長實（00001）升3.3%、新世界發展（00017）及信和置業（00083）分別升6.4%及2.3%。

業績因素已作反映

今年新樓落成量有限，發展商如何部署售樓目標，不妨等着瞧。一手樓樓價喺求大於供之下，跌幅有限，與其繼續乾等，用家惟有降低要求，從二手樓入手。近日便出現市區大型屋苑二手單位被多個買家搶購，相信待用家入市信心增強，二手樓市場可現小陽春，專門做物業代理嘅美聯集團（01200）可受益。

美聯舊年上半年純利倒退，但都有兩億銀。由於去年下半年，特別係第四季樓市氣氛轉差，相信下半年表現會比上半年差，股價由去年初高位6.83元反覆回落至去年十月低位2.95元，累跌逾五成，已預先反映樓市走向及公司業務所受嘅影響。

踏入今年，美聯股價反覆回升，上周以來成交增加，股價重逾多條平均線，並重返去年六月份嘅水平，尋日收報4.9元，升5.8%。今日有市區重建項目截標，若地產商積極入標，相信可進一步釋放正面訊號，利好地產股表現。暫看美聯呢浪若能衝穿5元關，下一個較大嘅阻力區喺5.3至5.5元，回吐宜守4.5元。

金蝶盈警後未止瀉

提到業績期，本地銀行股已經開始陸續派成績表，但業績期有人歡喜有人愁，好似尋日隻佳華百貨（00602）發盈喜，股價升20%；反觀金蝶（00268）發盈警，股價急挫逾一成。講到金蝶，上個月炒Facebook上市，股價由1.8元水平抽上2.5元前才止步，上月底又有基金入場喺高位增持，萬料不到一個盈警，股價又碌返落起步位，短線補唔番下跌裂口（2至2.12元），尚未能言穩，可能要等業績公布，管理層解畫，先至有轉機。

Tip股我至Top

Sammi（2/8）Tip 中核國際（02302） 最多升16%

徐燦傑（2/7）Tip 太平洋恩利（01174） 最多升11%