樓市出更：小陽春未旺租柏景跌唔停

樓市氣氛爆旺，但實際係「旺買不旺租」。劉Sir八到，大角咀奧運站呎租竟然跌穿廿蚊，區內柏景灣複式戶租金累減三成，以月租3.5萬元租出，呎租只有17.3元，係歷來罕見嘅呎租低位。但資深投資者「摸王」黎汝遠（黎Sir）就話無有怕，尤其港島住宅，佢啱啱以2.83萬元租出北角城市花園中層戶，回報有約3.4厘，同時作「兩手準備」，以1,100萬元連約放售。

消息人士向劉Sir爆料，上述柏景灣9座低層複式單位，面積2,022方呎，業主原來意向月租5萬元，終減租1.5萬元，以3.5萬元獲承租，呎租僅17.3元，相信係奧運站歷來難得一見嘅低呎租水平。

柏景複式低30%租出

區內代理香港置業文愛玲話，今個月奧運站租賃成交已超過33宗，平均呎租約25至28元。劉Sir屈指一數，以呢個複式戶成交呎租17.3元計，真係最少低市價三成。

亞洲地產姚雲龍同劉Sir講，上述黎Sir租出嘅城市花園9座中層D室，面積1,010方呎，成交月租2.83萬元，呎租26.2元都算合理，黎Sir一○年八月以988萬元購入，回報約3.4厘，單位同時以1,100萬元連約放售。

「摸王」變招先租後賣

佢話最近黎Sir重新整理投資組合，港島優質物業先租後賣，而持有4伙城市花園先後租出3伙，最後1伙都搞緊裝修，嚟緊都好大機會放租。

黎Sir都話，樓價已經好貴，唔敢貿貿然入市，不過就唔擔心港島區住宅走勢，賣唔出都可以租住先，投資角度睇，「最緊要有得賺」。

事實上，北角主要屋苑交投的確活躍咗。世紀21日昇黃文龍話，城市花園5座高層D室減價8%至1,198萬元賣出，呎價8,757元，低市價5%。中原王承話，同區和富中心2座高層C室以1,010萬元售，呎價約1.07萬元。

整體租金走勢回落，美聯劉嘉輝根據該行嘅「租金走勢圖」指出，上個月住宅平均呎租按月減1.4%至19.81元，已經連續下挫五個月，為去年五月後首次失守20元。