短炒倉：中能 跟勢炒一轉

炒咗幾日嘅升市派對，上周五突然熄燈散場，不少跟風嘅散戶被捉個正着，尤其係先兩日升勢甚勁嘅太陽能板塊，如保利協鑫（03800）同卡姆丹克（00712），跌幅分別達11%同9.6%。

前稱漢寶嘅中能控股（00228），去年底將本地酒樓業務以590萬元出售，正式跟這舊業務講拜拜，之後會專注於天然氣的勘探開採業務。不過，集團夥拍中石油（00857）母公司，在新疆塔里木盆地喀什北區油氣田進行鑽探及開採燃氣，暫時仍然未見成果，截至去年六月底止的中期業績，虧損持續擴大，至6,208萬元，股價表現亦一落千丈，由舊年最高0.5元，跌至近日低見0.09元之下，不過踏入二月份開始轉勢，成功脫離仙班，上周五高見0.135元後回落，但收市仍然升5%，在一眾股仔中表現已屬偏強。

炒得中能呢類股，當然大家都心照唔係咩價值型投資，純粹係跟勢炒一轉。睇佢過去兩日成交至開始放量，應該仲有進一步舞上嘅空間。該股上周五收市報0.124元，以0.15元為目標博一鋪，跌穿0.115元打靶。

中能控股（00228）

阻力位：0.150元

支持位：0.115元