股海實戰：買領匯博財息兼收

上周港股喺高位整固，恒指多次即市升穿21,000點後現回吐，上周五收市報20,783點，單日跌226點，成交回落至774億元。唔少上周初當炒嘅二、三線股，去到上周五經已現疲態，好似保利協鑫（03800）即市先抽高上3.23元，再掟落2.87元收市，單日跌11%；旭光（00067）及卡姆丹克（00712）分別跌4.8%及9.6%。接力板塊則有家電股，海爾（01169）、海信科龍（00921）及創維（00751）升幅介乎1.9至3.6%；上周四阿莊話挾倉行動未完嘅國美電器（00493）逆市升1.3%，守穩2.2元仍有望做支小旗仔再來個突破。

必瘦站守穩招股價

必瘦站（01830）上周五首日掛牌股價曾高見1.01元，收報0.89元，較招股價0.88元微升1.1%，若然T+2股價企穩招股價樓上，唔排除收集過後仲有好戲上演。

內地上月新增貸款僅7,381億人仔，按年少2,882億人仔，較市場最初估計的1萬億人仔為低，部分原因相信係受春節因素影響，若然呢個解釋成立，二月份新增貸款金額應該會較一月為高，否則嘅話，市場可能須要對全年新增貸款目標進行重新評估。

阿莊喺度諗，技術上呢輪港股升浪經已差唔多，但若然真係錢作怪推高恒指突破21,000點，再挾高一千幾百點嘅可能性唔可以完全抹煞，只係呢一挾可能升得快時跌亦快。言則大戶要推高指數，會從邊類股份入手？近期中資股唔少都開始冇力再上，反觀香港地產股同期表現落後，會唔會遲來先上岸，就要等着瞧。

阿莊身邊嘅朋友，唔少喺度等緊樓價下跌入市買樓自住或投資，經驗告訴阿莊，咁多人等樓價跌，樓價實際跌幅會有限。再講，今年係龍年，生B潮已廣為人知，加埋雙春兼閏月，好多青年人準備把握好年成家立室組織小家庭，相信對中小型住屋需求有增無減，而睇番今年私樓落成量估計僅八千個，咁講法樓價點會跌？

樓價唔跌，通脹上升，租金亦只會有加冇減，地主股股價有條件炒落後，收租股亦可視為今年嘅穩賺對象。舊年二月阿莊話收租王領匯（00823）抗跌力夠強，果然舊年其股價跑贏大市，相信今年可以繼續保持佳績，有錢嘅話，與其揸現金等貶值，倒不如考慮買領匯博財息兼收！

Tip股我至Top

積奇（2/8）Tip中芯國際（00981）最多升12%

藺俠（2/7）Tip恒指法興熊（60069）最多升20%