樓市出更:屯門炒車位話咁快賺17%

發展商連番拆售車位套現,由於車位唔受額外印花稅限制,無論投資或自用皆宜,所以市場承接都唔錯。劉Sir同代理老友傾開,話上月推售嘅屯門居屋美樂花園車位,已經極速錄到一宗車位摸貨成交,短短兩個禮拜賺2萬元,升值近17%。

新世界(00017)近半年已經拆售多個屋苑車位,其中以美樂花園反應最理想,市場消息話,上月推出至今僅一個月,已經賣咗約400個車位,每個介乎11.8萬至12.8萬元。

講起近期摸貨成交,中原陳世豪同劉Sir傾開,有個美樂花園業主上月中以11.8萬元買入一個單號車位,下個禮拜先完成交易,但近日已成功以13.8萬元摸出,短短兩個禮拜帳面賺咗2萬元,賺幅近17%。

美樂車位 十餘萬有交易

佢仲話,依家市場已經有二十幾個呢類二手車位放盤,普遍叫價15萬至16萬元,叫租就每月900至1,000元,個別位置「無咁靚」車位,月租更低至600至800元,近期已經吸引到近10宗預租個案,租金回報有7厘。

至於同區嘅景峰花園,亦賣咗50個車位,其中有蓋車位售約12萬元,露天約10萬元,其中有蓋車位已經賣晒,依家市場大約有10個二手放盤,租金叫價由800至1,200元不等,視乎位置而定,而露天車位叫租500至600元,不過可能因為發展商仲賣緊,暫未錄到成交。

其他好似筲箕灣居屋愛蝶灣,新世界已經賣咗約43個車位,每個賣約32萬至35萬元,集中低層較佳位置,近日市場亦出現零星二手放盤,開價比發展商高約5至10%。另外,牛池灣居屋嘉峰臺亦售出42個車位;而新蒲崗采頤花園則沽出106個。

新世界拆售 半年套3.5億

市場消息仲話,連同私人屋苑計,新世界近半年已經賣出超過1,100個車位,涉資近3.5億元,其中居屋車位佔去一半。

另外,「大好友」信置(00083)今年初亦拆售馬鞍山海典灣約60個車位,世紀21徐永成預計已經賣出約八成,大部分屋苑業主購入自用,現時放租車位每月租金約2,500元。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

劉Sir

年初獲發展商拆售的屯門美樂花園車位,極速錄得一宗摸貨成交,賺幅近一成七。