Fundman睇市：瑞年夠晒條件炒落後

尋日港股開市前，內地公布一月份通脹數字，由去年十二月的4.1%回升到4.5%，同分析員估計繼續回落至4%，大相逕庭，港股期指客前日收市偷步炒通脹回落，挾到大高水近百點收市，最終通地眼鏡碎片，朝早期指低開，恒指最多跌231點，最後見A股拒絕調整，淡友先知表錯情，港股跟隨跌幅收窄。其實，內地通脹同預期嚴重偏差，有可能係市場低估中國人過年前購物送禮習慣，對食品價格的拉動力度，去年春節響二月，今年是一月，根本不宜直接比較，睇番數據明細部分，一月食品價格急漲10.5%，反之，非食品價格繼續按年回落，跌幅1.8%，單係呢點已足夠產生0.5%的落差。

A股昨日對數據反應唔大之外，睇番上海同業拆息市場，幾乎全線回落，隔夜及一星期分別跌11及4點子，去到2.6567厘及3.6708厘。市場對減存款準備金率的預期，儘管連番落空，可是人行繼續「暗手」放水，又再停發一年及三個月期央票，令市場多440億元人仔回籠。由前日加成品油價到拆息鬆番，史提芬估計A股因為缺水行三步退兩步的日子快將結束，如果追番其他新興市場今年以來雙位數的升幅，要多升5至10%應該唔係難事。

正面消息陸續有來

筆者覺得市場未反映，但或令股市亢奮性上升的幾個因素：包括尋日傍晚交行（03328）集資批出接近80億美元新股，據知滙控（00005）、社保基金及幾個中央財金機關全數承接，無貨出街，對內銀股有正面作用。

另內地打壓樓市風向可能有變，有消息指中國銀行（03988）有北京嘅分行，向新樓首次置業買家，提供按息八五折優惠，二手樓首置買家也享九折利率，主要針對同大型開發商合作的一手樓盤。另外三線城市，安徽省蕪湖靜靜地起革命，如購買普通商品房享契稅百分百補助。若非善忘，幾個月前佛山市政府都曾經偷步推救樓市措施，結果不足十二小時被中央叫停，若今次唔見中央出手遏止，講唔定政策「堅」轉向，一些高土儲嘅內房股如恒大（03333）及富力（02777）等，隨時炒到飛起。

眼見唔衰唔炒，雨潤（01068）、李寧（02331）紛紛被追落後，令筆者想起，去年管理層同大摩隔空罵戰，搞到股價一度被洗倉隊落1.96元上市新低的瑞年（02010），在愈有缺點愈炒的氣氛下，似乎仲有炒上水位。瑞年生產及銷售保健產品，去年大摩質疑公司未來兩年增長來源的涼茶業務，在二、三線城市餐飲及專賣小店的發展情況，直到管理層搬出去年第三季營運數據，大摩最後認低威，將由7元大幅削至1.9元的目標價，調高番六成五去3.14元，手法兒戲到極。

近期藥業及內需股開始炒落後，去年上半年公司賺2.57億（人民幣．下同），升45%，等於一○年全年盈利3.52億的73%，照理是有機會達到街外大行估計的4.89億。但其實單以六倍市盈率唔到，而業務有增長公司，應已有足夠條件炒一炒落後，尤其股價仲未返到舊年十一月反彈高位3.44元，三月中份業績得定唔得，到時至算，純粹炒落後，看來已集齊天時地利同人和。