股海實戰：億和反彈動力強

內地一月份CPI數字由去年十二月的4.1%回升至4.5%，高於市場預期，雖然一般相信係受春節因素影響，但至少亦要睇埋二月份數據，先至能判斷通脹是否經已完全受控，此前調控政策轉向機會極微，這一點也許會制約短期A股市場表現。

港股方面，恒指繼續喺21,000點前震盪整理，成交突破900億元，好淡爭持轉趨激烈。阿莊近呢大半年來喺魚缸，鮮有感受到近日咁熱烈嘅氣氛，特別係二月以來，不斷有坐咗成年冷板櫈嘅股仔發力，係吸引多咗散戶肯落場跟炒的原因。

阿莊手持嘅聯想集團（00992），宣布截至去年底止第三季度業績，季內淨利潤為1.53億美元，同比增54%，銷售額、全球市場及內地嘅市場份額均創歷史新高，整體表現對辦，消息刺激其股價尋日一度高見6.55元，收報6.49元，升3.8%，成交6.8億元。阿莊講過呢浪升到上6.5元樓上會睇位食胡，尋日遂以平均價每股6.51元沽出六萬股，獲利3.3萬元。

自動化工序成趨勢

近日經國務院同意並批轉的《促進就業規劃（2011至2015）》指出，十二五期間，最低工資標準將年均增長達13%以上。換言之，未來幾年，內地勞工成本持續上升已成為定局，如何提高生產效率，減少使用勞工密集工序，係製造業一個重大挑戰。

研製生產工具，增加自動化工序，係有效應對勞工成本上升嘅方法。好似近十年八載，家用打印機冇咩點加價，反而功能愈來愈多，打印連傳真、電話同掃描，幾百蚊都有交易。點解會咁？皆因日本早已研發及推行自動化工序，慳咗勞工成本，增加企業競爭力，亦都益咗消費者。

拓汽車零部件業務

一向替日本客戶製銷辦公室自動化設備嘅億和（00838），喺設備自動化需求上升之下，生意唔憂做，而近年除咗呢瓣業務之外，亦開始將視線轉移至內地消費市場，涉足高質汽車零部件市場。

奇就奇在，去年以來其股價反覆回落，上半年可歸咎於日本大地震嘅影響，但近半年股價跌勢仍未止，本周曾低見1.25元，14日RSI落到17，小股東睇到腳震震，慶幸跌浪中大部分時間成交唔係好多，反觀近兩日股價反彈成交明顯增加，尋日收報1.55元，升9.15%，成交股數6,551萬股，乃去年四月一日以來最大單日成交股數，明顯動力十足。但講到業務前景如何，則要等嚟緊三月底公布嘅年度業績，至有答案。