摸王教路：今年要忍手

樓市前景未明，唔少物業投資老手都話依家個市好難睇，宜守不宜攻，其中，素有「摸王」稱號的資深投資者黎汝遠（黎Sir）都話，今年投資策略一字記之曰「忍」，忍手唔入貨；同時，佢亦透露，依家揸住北角二、三十個住宅單位，諗住清一半，所以啱價、賺少D都可以賣，至於減幅就視乎單位，個別減幅可以去到一成。

近幾年，黎Sir好少大手掃貨，反而專心紅酒投資及打理旗下良駒，不過，遇啱優質盤都會買。佢話，舊年開始政府多幅賣地成績麻麻，足見發展商對後市好有保留，甚至可以用摸石頭過河來形容，所以今年都會唔敢咁勇入貨，記住要忍手。

寧揸現金 劈價賣和富

黎Sir仲話，依家樓市前景未明朗，股市大上大落，最好都係揸現金，所以佢北角嗰二、三十個住宅單位，目標今年減持一半。有代理早前爆料，話黎Sir累積減價共100萬元後，成功沽出北角和富中心3座高層D室，較原先叫價劈差唔多12.5%，以面積約846方呎計，呎價約8,274元，持貨約一年帳面都有50萬元執。除咗住宅單位，依家仲揸住兩項商廈單位，因貨源唔多，所以唔係咁急賣。

其實近排市場承接力唔錯，唔少二手住宅業主都趁機出貨，中原鮑允中話，九龍灣淘大花園P座高層6號室，放盤只不過四個鐘，已經有客問盤，原業主考慮無耐即刻決定賣，成交價268萬元，呎價大約5,583元。另外，世紀21奇豐徐永成報料，馬鞍山翠擁華庭11座低層A室，原業主都係放盤一日都唔夠，好快就拍板減價2%賣出單位，成交價455萬元，呎價大約5,242元。

師奶鬥沽 美孚短炒賺

除此以外，連久未有動作嘅美孚師奶兵團亦再度出貨，美聯林海成稱，荔枝角美孚新邨1期百老滙街18號低層戶，由師奶兵團前年三月約448萬元購入，剛連租約售約620萬元，呎價約5,331元，持貨不足半年帳面賺約172萬元。