股海實戰：國美挾倉行動未完

個市近排蠱蠱惑惑，恒指周一升上21,015點高位後呈單日轉向，周二雖然繼續調整，但始終都跌唔落，阿莊都覺得隨時又再挾過，果然不出所料，經過兩日整固後，尋日晏晝終於按捺不住，恒指反覆上揚，最後升319點，以接近高位21,018點收市，創半年以來收市新高。

由尋日開始，中央將柴油價每噸上調300元人民幣，令到相關股份做好。另外，內地有報道指一月份四大行貸款投放達到3,000億元人民幣，以此推算，一月內地銀行業全部新增貸款規模可望達到8,000億元人民幣，在流動性充裕下，加上市場憧憬中央有機會下調首套房貸利率，故一眾內房股昨日有追捧，中國海外（00688）及華潤置地（01109）分別升逾5%及3%，合景泰富（01813）更升近一成。

升穿250日線唔難

除咗內房股有追捧外，本地地產股都有唔錯表現，長實（00001）同新地（00016）都升超過2%，只要內地今日公布的通脹數據符合預期的話，恒指要升穿250日線21,032點，絕對不成問題。

自從中央逐步退出家電補貼政策，市場估計今年白家電市場會由盛轉衰，家電零售股國美（00493），間接亦受到牽連，近幾個月走勢納悶，一來之前股東之間的爭拗，早就嚇怕唔少芬佬，其次聖誕及新曆年假，一線城市同店銷售錄得5至10%下跌，只得二三四線城市保得住持平的同店銷售表現，故國美股價自去年十一月中開始，一直在1.73至2.1元之間橫行，缺乏方向，並無跟隨大市向上。

不過，近日資金炒完內銀、保險後，估值開始唔平，而嚟緊公布的一一年業績中，第四季表現未許樂觀之下，苦無出路的資金，反而揀稍有瑕疵的板塊嚟炒，好似建材、內需及內房股，尋日國美大成交底下股價見突破，升0.23元，報2.22元，成交7.18億股，是接近十四個月最多。

其實基金揀國美，無非係貪佢估值夠平，比較審慎的分析員，預測今年業績增長一成左右，即使昨日抽升後，一二年市盈率亦不過10.5倍，作為一間龍頭家電零售商，股價唔貴，壞消息早就充分反映在壓縮後的估值身上，升穿2.11元技術阻力，加埋有大沽空配合，挾倉有機會持續多幾日，短炒將目標放2.4至2.5元，唔算太貪也。

Tip股我至Top

暴炒男（2/6）Tip匯銀家電（01280）最多升14%

Sammi（2/6）Tip海豐國際（01308）最多升11%