樓市出更：甲廈求租平10%有得傾

環球經濟前景危危乎，唔少企業都削減預算開支，擴充大計要推遲，本港核心商業區寫字樓租賃更加少到得人驚。有代理同劉Sir呻，上個月港島甲級寫字樓租務只有7宗左右，應該係舊年以嚟最差嘅一個月。部分業主已經開始出招自救，除咗例牌嘅減租同加佣外，有業主已罕有咁提供一成幾嘅議租空間，希望盡快租出單位。

歐債問題由舊年講到今年，唔少企業都按兵不動，本港寫字樓租賃市場已明顯受壓。

有代理同劉Sir講，舊年第四季港島甲級寫字樓每月租賃都有10至20宗，不過上個月就只有7宗，係舊年以嚟單月新低，部分業主已經反客為主，各出奇謀為求租出單位。

好似上環信德中心西翼低層戶，面積大約1,400方呎，業主原先意向呎租要48元，但如果劈租，可能嚇走租客，於是主動將議租空間由今年初約4%，大幅擴大至近13%，即最終呎租只約42元，月租近5.9萬元。

力寶三個月兩度劈租

不過，有業主就認為，減租較為直接及省時。市場消息人士話，金鐘力寶中心2座中層一個約2,200方呎單位，業主短短三個月內已經減租兩次，幅度共逾11%，由原先意向呎租約62元，下調至約60元，日前再大幅減租至約55元，即係最新月租約12萬餘元。

鄭躬洪估租金仍受壓

另外亦有業主選擇加佣鼓勵代理促銷。好似金鐘美國銀行中心一個高層單位，面積大約2,200方呎，業主暫時維持每方呎約65元放租，即月租約14.3萬元，不過同時將代理佣金，由一個月租金加至1.5個月以作為鼓勵。

資深投資者鄭躬洪就同劉Sir講，環球經濟今年仍然受困，企業擴充步伐將會更加審慎，預期今年本港寫字樓租金仍有下調嘅壓力。