股海實戰：香港中旅上車揸中線

上周恒指成功突破20,500點水平，周五喺20,600至20,700點水平整固，埋單微升17點收市，報20,756點，成交635億元。驟眼睇，近期股票升勢全面，確有幾分牛氣，之不過，阿莊始終認為防人之心不可無，特別係三月份環球股市暗藏殺機，加上一月以來恒指經已挾高2,300多點，大戶夠晒水位食胡，提防隨時會反手做淡。

和黃借買橙炒上

若然呢轉恒指睇21,000點，呢啲位再繼續追入超賣股份，確實值得商榷，但阿莊都好明白升市冇貨之苦，總之量力而為。上周四阿莊買入新華保險（01336），見翌日股價曾高見32.1元，有兩蚊利潤，遂以平均價每股31.8元食胡，短炒獲利3.9萬元，且看30元或樓下可唔可以又再上番車﹗呢個禮拜會重點關注手持嘅聯想（00992），事關本周四將宣布業績，希望可以順利喺6.5元或樓上食胡。

藍籌股中，上周五輪到和黃（00013）借收購奧地利Orange嘅消息炒上，股價曾高見77.2元，收報76.4元，升3.3%，成交15.9億元。不過，見其14日RSI抽到上73，短線未必可以一口氣突破78至80元阻力區，若然想買相關購證，可再睇多一陣先下決定。

大有大炒，細有細炒。上周唔少股仔異動，但不少成交未配合，燒冷灶好考眼光，以免被套牢。其他中資股板塊，上周五輪到醫藥股接力，國藥（01099）、上藥（02607）及四環（00460）升幅介乎8至11%，若然本周初炒風持續，細細粒容易食可留意銘源（00233）。

若然要繼續發掘明日之「升」，上周五提及嘅電訊設備股係一類，另一類更冷門嘅就係旅遊股。今年多個部委聯手催谷節慶娛樂消費，加上旅遊業改革持續推進，呢類股翻身唔係冇希望。好似阿莊多次品評過嘅香港中旅（00308），舊年中期業績已開始見到有起色，更一度擬分拆酒店業務，只可惜市況唔就。今年市況及政策配合嘅話，照計圍繞公司嘅消息流趨向正面。

走勢上，原來唔聲唔聲，中旅股價經已由去年十一月低位1.1元，回升至上周五高位見1.58元，累升逾四成，亦已扭轉了自一○年初以來嘅下降軌趨勢。呢啲位上車揸中線具值博率，目標上番NAV（截至去年六月底止為2.06元），回吐宜守1.34元。

Tip股我至Top

藺俠（2/2）Tip恒指大和牛（60061）最多升42%

阿莊（1/31）Tip和記電訊（00215）最多升13%