樓市出更：公屋居屋 淡市出樓王

雖然私宅做價回落，但劉Sir發現舊年下半年到依家，仍有約11個二手公屋綠表成交呎價破頂。鴨脷洲利東邨就有中層戶以實用面積呎價3,727元賣出，成為港島區綠表呎價最高公屋單位；同期居屋筲箕灣東旭苑有單位以446萬元賣出，實用面積計呎價6,860元，做價同呎價問鼎綠表居屋之王。

住宅樓價自從擺脫○八年金融海嘯跌勢之後，升勢一浪高於一浪，有置業需求且合資格嘅基層市民就寧願買位置方便，但售價唔使200萬元嘅綠表二手公屋，所以舊年下半年喺樓市氣氛咁差之下，仍然有多個公屋創出綠表呎價新高。

好似港島公屋樓王一向係華貴邨，不過地位依家就畀利東邨取代，事關利東邨喺舊年下半年至今錄得3宗綠表價成交，呎價全部超過3,500元。其中一個東業樓中層單位，實用面積約381方呎，成交價高約142萬元，計落呎價約3,727元。

大埔公屋呎價二千六

至於新界北區二手公屋綠表呎價亦突破2,500元關口，大埔運頭塘邨運來樓一個中層單位，實用面積445方呎，舊年十月以118萬元賣出，呎價2,654元。

除咗公屋之外，二手居屋市場表現都唔差，由於優質二手居屋單位，依家自由市場價已經突破600萬元，令到居屋綠表價都水漲船高。舊年八月份市場首度出現破400萬元綠表價成交，個單位係筲箕灣東旭苑一個高層戶，以實用面積計，呎價6,276元；跟住係九月份同屋苑再有一個高層實用面積650方呎嘅單位賣出，成交價去到446萬元，呎價升至6,860元，成交價同實用面積呎價，都已經超越舊嘅居屋樓王鰂魚涌康山花園。

至於上個月公屋買賣登記繼續減少。中原數據顯示，一月份只得18宗公屋買賣登記，按月少咗28%，係37個月新低；期內有15宗「百萬公屋」，亦係24個月新低，而期內更加冇短期轉讓個案。