投資SUN角度：短炒上落市只宜小注怡情
進入短期整固之後，短炒想贏錢，就要逆市，升得勁時候沽，跌得多就冒險去接。唔賭唔舒服，又或者想保持市場觸覺，不妨用上述策略，但一定要減低注碼。香港是一個充斥衍生工具的市場，因此走勢特性是短線走勢往往極之單邊，有趨勢的日子多，整固的時間短。今次短線上落市，是由本周一正式開始，進行了三個交易日，以一向經驗，可能已近尾聲，隨時出現突破。
自己基本上甚少用上落市打法，因為需要至少一兩個交易日時間，在市場試了一兩次底部及頂部後，展現升唔穿跌唔落的特質，才可以察覺進入了上落市，再多一兩日之後很可能突破，回復有趨勢的市場，就已經不能以低買高沽的形式作戰。最重要是短炒上落市風險高回報低，不似在單邊市之中，可以博大茶飯。因此炒短線上落市，不外是小注怡情，保持自己的靈敏度，務求在下一個單邊市出現之際，及早行動，贏取較大的回報。
（作者為註冊持牌人士）