股海實戰：中國南車小注博突破

財政預算案出爐，期望再獲派錢的市民好夢成空，但對納稅人嚟講，派唔派錢係其次，減稅仲實際，結果如願，再發不多於一百億元的通脹掛鈎債券則是回應市場需求之舉，有總好過冇。老實講，末屆政府預算案，因循守舊，唔做唔錯係預期之內，反正冇期望就唔會有失望。

A股滬綜指始終未能企穩2,300點樓上，低收作結，港股缺乏衝頂條件，昨日表現反覆，恒指早段見高位20,534點後現回吐，收市報20,333點，跌57點，成交617億元。

中芯國際（00981）昨日高位見0.43元，收報0.425元，升3.6%，成交3,000多萬元，公司將於下周三公布業績，聽聞業績後或有搞作，可睇實交投是否成氣候。

一月份市況好轉，唔少上季暫停IPO活動的公司都積極捲土重來，好似隻必瘦站（01830）就正進行招股，由於公司務實地將招股價大幅下調，聽聞有頂頭槌飛支持，相信呢趟不容有失。至於半新股，新華保險（01336）近期調整迅速完成，昨日曾高見29.8元，收報28.95元。聽基金講，呢隻股街貨唔多，內地金融股消息配合的話，年中前唔難踢上33至35元水平，28元樓下唔怕買咁話。

航運股跟炒靠唔住

內地PMI數據有改善，炒家又乘機翻炒航運股，見中國遠洋（01919）、中遠太平洋（01199）及中海發展（01138）升4至6%。不過，眼見去年十月以來反映運費表現的波羅的海乾散貨指數累跌超過一半，目前正處於五十二周低位，阿莊實在說服唔到自己落場跟炒。

若然要冷敲，倒不如望番啲鐵路股，經過去年一役，估值合理得多，目前水平衰極有個譜。有追開呢個欄，都知阿莊心頭好是中國南車（01766）。最近三個月，呢隻股一直受制於5.5元至5.6元，上周升到上該水平再次遇阻，昨收報5.21元，升1.96%，見14日RSI調頭回升，MACD維持雙牛利好，可小注博突破，大成交配合升穿上述阻力，相信好快見6元，50日線支持在4.88元。