鬥掃新盤大款讓路

地產代理老友同劉Sir講，舊年第四季內地個人買家買香港樓宗數比例去到13.7%歷史高位。不過，由於舊年第四季，唔少發展商以貼市價推盤，引發本地買家由二手市場湧去買一手樓，所以扯低內地買家入市一手樓比例，按季急挫15.2個百分點至26.8%，跌幅係○七年有紀錄以嚟最高。

由舊年第二季開始，內地個人買家（名字以漢語拼音）比例一直高企一成以上。中原地產研究部高級聯席董事黃良昇話，舊年第二、三季，內地個人買家佔整體住宅成交比例已突破一成，去到11.8%與12.7%，而第四季雖然樓市充斥不利消息，但比例仍進一步升到13.7%歷史高位。

舊年一手市內地客佔28%

不過，由於上季本港樓價明顯回軟，唔少發展商都改變賣樓策略，用貼市價賣樓，所以觸發銷售熱潮，大量本地買家湧現，扯低咗內地買家比例，令到第四季內地個人買家佔一手住宅成交量急跌到26.8%，唔單止比第三季嘅42%，銳跌15.2個百分點；而佔成交總額34.6%，亦比第三季嘅51%，跌咗16.4個百分點。不過，黃董就預期，今年首季，內地買家佔本地一手樓市嘅比例會有所回升。

至於二手私宅市場，舊年第四季已知內地個人買家佔宗數比例保持喺10.1%，佔金額就微升0.8個百分點至15.2%。

若以全年嚟睇，舊年內地個人買家佔一手成交宗數比例，仍然創新高，舊年全年佔28%，按年多出8.6個百分點，亦係首度突破兩成水平。至於二手物業市場及整體物業市場，該類買家佔宗數比例分別有8.7%與10.9%，亦係○七年以嚟新高。