短炒倉：銘源醫療 小注怡情

受A股拖累，港股跨年六連升亦告斷纜，之前升得多嘅股份，跌勢尤其顯著，反而一啲去年嘅大弱勢股，就仍然得到炒落後資金眷顧，尋日逆市升1.9%嘅銘源（00233）係其中之一。

講到弱，喺內地從事疾病檢測、藥物研發同產銷的銘源，可謂代表之一，股價由前年十一月高位1.4元，跌足一年，到去年十二月尾最低見0.195元，累跌八成六，就算喺舊年三月0.81元配股至接貨嘅，都要輸76%。而集團截至去年六月底止中期純利跌27.1%至6,653萬元，主要是因為舊將C-12產品升級至C-12A影響銷售所致。

論基本因素，銘源暫時乏善可陳，不過純粹睇圖就相當似樣，股價從0.22元水平連升四日，昨日收報0.265元，10日線已升穿20日線，喺大市調整之時，呢類大幅跑輸嘅股仔，反而往往有意外驚喜，但當然只宜小注怡情，博其上試0.3元，支持位0.25元。

銘源醫療（00233）

阻力位：0.30元

支持位：0.25元