Fundman睇市：領匯提供穩定回報

千呼萬喚，A股春節假後復市，當個個以為裂口高開，可以升破2,350點，殊不知滬綜指高開5點之後愈跌愈有，最後以穿頭破腳收市，跌34點，報2,285點。偷步炒高的港股，期指結算日好友唯有鳥獸散，跌341點，收20,160點，七隻逆市上升的藍籌中，包括兩電一煤三隻公用股，令人懷疑市場風險胃納，是否又再轉向？

睇數據，上星期環球股票基金錄得十九個星期以來最大淨流入，達84億美元，債券基金則錄得61億美元淨流入，是十一個星期以來首次低於股票基金，過去幾個星期流入股票基金熱錢，主要係ETF及對沖基金，到上星期輪到傳統的淨長倉基金（Long Only），呈現去年四月以來最大淨流入，筆者不是有意貶低一班Long Only基金，但近幾年佢哋比起對沖基金的確有後知後覺之感。或者歐債危機紓緩，加上內地貨幣政策有轉向餘地，後市仍可看好，但見慢半拍嘅Long Only都已經入埋市，再推上去或者需要更大的利好因素配合，短期回吐機會唔細。

財政自由唔容易

最近睇到本地討論區，不少八十及九十後網友討論怎樣才算財政自由。討論當中，最廣泛爭論的是要儲多少錢才可達到完全的財政自由，失業、遇上意外、生病都不怕影響生計那種，見到一個比較合理的說法，是月薪的二百倍，網友指以4%投資回報，意味每個月大約可以賺到之前全職工作每月三分之二的固定收入。

撇開怎有可能打工16.6年，唔食、唔住、唔用，去累積二百個月收入財富。超低息環境持續下，要找4%穩定回報，其實並非大部分人所想的容易，尤其今日定期存款利率因為美國經濟問題，跌到可恥水平，連股神巴菲特都勸股民接受較低回報，投資鐵路企業。

較多網友認為，股市不難搵4%股息回報，但實情四十八隻藍籌股，去年往績股息率有4厘以上的，得九隻，不到總數的五分之一，超低息環境下，不少高息股股價跑贏大市，已令股息率回落。況且即使強如藍籌，也不排除有殞落的一日，假如你當年買香港電訊，今日只係換來一殼眼淚，較近期的例子則是思捷（00330），筆者深信，一二年股東再不會得到8.5厘的股息，閣下如果去年將全副身家押上，今日只剩本金的三成，要在家享受財政自由，恐怕是知易行難。還有一點，是儲到二百個月收入，準備半退休甚至不再工作，到時才學人投資，全副身家投入股海，是需要極大勇氣，故投資仲係愈細培養愈好，並要戒掉不勞而獲的心態。

但話說回頭，退休人士希望要穩定回報，並非全無選擇，像領匯（00823）一類的房地產信託基金，受證監會REIT code限制，淨收入九成要派回基金持有人，旗下資產也交給託管人管理，不能隨便買賣，避免所託非人。最後，這類基金雖然有穩定股息回報，但股市波動，對其價格也可以有影響，去年九月就曾經由接近28元幾日內跌至23元水平，故即使入市，最好能留一些現金，好有低位加注的條件。