財團爭舊樓妙計避狙擊

市區舊樓重建潛力驚人，近年成為財團搶奪嘅目標。其中九龍建業（00034）早排申請強拍嘅登豐街1及3號，罕有被其他財團狙擊，最終要搶貴超過三成二先買到。事實上九建毗鄰仲有幾項舊樓等住強拍，都咪話唔頭痕；不過，據萊坊物業同劉Sir講，佢哋等緊喺今日強拍嘅登豐街5及7號，已經取消拍賣，原因係財團同小業主達成協議統一業權，避過一場爭奪。

九建申請強拍嘅登豐街5及7號舊樓，原先安排喺今日大年初九公開強制拍賣，市場一般相信，繼早排拍賣同街1及3號遇到其他財團爭奪後，今次難免會再有。

不過，尋日萊坊物業顧問就同劉Sir講，發展商同小業主已經達成咗協議，所以個拍賣會亦取消埋。

呢個項目舊年年尾獲法庭批准強拍，仲定咗個底價係4,880萬元。

購併舊樓 屢遇波折

睇番近年九建積極响舊樓市場購併舊樓作為土儲，不過就出現不少波折。好似舊年一月佢哋強拍西環均益街項目嗰時，就遇到一班西環小業主走嚟抗議；而前年收購咗香港仔登豐街1至11號大部分業權，為咗方便向法庭申請強拍，就將地盤拆細做三個項目入稟申請，今個月啱啱先成功將登豐街1及3號統一業權。

不過，九建今次強拍就罕有地被其他財團狙擊，最後成交價為6,800萬元，比起法庭頒令嘅強拍底價5,142萬元，足足貴咗超過三成二，合共承價達到三十四口，係○五年大坑麗星樓之後，公開強制拍賣會中，競爭最激烈嘅一次。

今次完成香港仔登豐街1至7號，九建仲差登豐街9同11號，就可以將成個收購項目嘅業權統一，依家呢個項目仲係排緊期聆訊。