魚缸Blogger：成渝高速再次起動
希債繼續靠削髮吊鹽水保命，消息指最快今個禮拜可以傾掂數，而內地股市今日復市，祖國積壓多時嘅購買力配合上周五港股期指大高水，大市今日絕對有看升嘅理由。
上周五落後板塊輪到內地公路股有異動，有指係同基金配對交易有關，但成個板塊舊年走勢大落後，近日多個板塊又已被炒上，計落公路股亦係時候起動。其中，四川成渝高速（00107）雖然舊年上半年純利輕微倒退，但第三季純利已回升23%至3.68億元人仔，加上有份參與興建同營運嘅新公路項目將陸續通車，而旗下公路項目所身處嘅四川省又受惠西部大開發嘅國策，該股上周五衝穿近兩個月橫行阻力，若回試3.2元不妨作部署，阻力睇3.7元。
