短炒倉：東岳破7元冇難度

經過農曆新年期間幾日嚴寒，天氣終於叫做暖番啲，志強都唔使再攬住個暖爐做人。講到冷，志強今個月頭介紹生產製冷劑嘅東岳（00189），之後升勢未停過，由當時的5.33元，一直升到上周五收報6.65元。表現咁強當然有道理，皆因集團月中發盈喜，預告受惠於產品需求強勁，加上邊際利潤改善，去年全年盈利會較一○年大幅上升。

其實東岳發盈喜唔出奇，事關集團中期純利已勁升4.16倍，至14.15億元（人民幣．下同），整體毛利率按年由25.44%擴闊至44%，如果全年業績冇盈喜就弊傢伙。反而集團主力製冷劑產品R22，去年下半年價格大跌，對下半年盈利的影響程度，更值得留意。另外因環保問題R22漸被淘汰，替代產品如R439a及R125等能否成功接力，還有離子膜產品的開發進度，都是東岳未來盈利重點所在。

無論如何，集團一○年盈利7.33億元，假設一一全年盈利增長兩倍，賺21億元，每股盈利1.21元（港元．下同），現價預測市盈率僅約5.5倍，實在相當便宜，去年底兩度受阻於7元水平，應有力衝破，上望7.5元，支持位6.3元。

東岳（00189）

阻力位：7.5元

支持位：6.3元