股海實戰：利豐有機挑戰20元

惠譽接力下調歐元區五國評級，但市場早有預備，故反應尚算冷靜。展望本周，焦點不離希臘政府與私人投資者達成嘅正式協議。今日A股復市，估計可力保多年新春傳統，紅盤高開。至於港股，上周五期指大高水已預示方向，加上今日又係期指結算，料周初恒指會維持喺高位，但回吐壓力正不斷增加，建議暫不宜高追，待試20,000至20,300點水平承接，再謀定而後動。

呢期幾乎日日都有新春團拜飯局，真係要啪多幾粒降膽固醇藥先搞得掂！講開春茗，上周參加某經紀團拜飯局，席間年屆九十有多嘅證券行老闆例行公事會講吓今年股市展望，由於呢位仁兄喺魚缸閱歷甚深，特別係○八年海嘯後投資股、樓嘅眼光和膽識叫人佩服，大家都洗耳恭聽，誰知老人家睇法係今年股市走勢難測，策略暫宜「不買不賣」。聽落取態似乎有點過於保守，且看呢個龍年係咪真係咁難玩！

上周阿莊話考慮沽出短炒嘅中國銀行（03988），上周五遂以平均價3.37元沽出30萬股，獲利11.5萬元，袋袋平安，發個新年財！

春節假前，市場一直憧憬人行會下調存款準備金率，但結果未有成為事實，事關當局選擇透過公開市場注入資金嘅方式，增加逾4,000億人仔嘅流動性，變相減咗一次存準率，及時紓解咗市場嘅資金壓力。展望二月份，大量逆回購嘅資金會喺二月初到期，須回籠人行，屆時市場流動性或再度緊張，再睇印度上周亦已下調存準率，人行會否繼續堅持不動，就要拭目以待。

本月累升兩成八

近期利豐（00494）母公司動作多多，除咗提出收購漢登（00448）外，上周傳來擬收購法國品牌權益。雖然消息主角係母公司，但阿媽有喜事，做阿仔嘅都可以沾吓旺氣，上周股價創去年五月下旬以來新高，本月以來累計升幅亦達到28%。

事實上，近年利豐本身嘅發展亦轉積極，早前披露旗下利豐亞洲於去年九月收購全威集團大中華地區童裝及玩具業務，料未來將繼續拓展亞洲區嘅分銷業務，有助抵銷歐美經濟不景嘅負面影響，整體策略為大行認同，大和近日便將利豐嘅目標價定喺22.7元。

睇番利豐股價走勢，已成功突破近半年嘅頂部阻力，今轉有機會踢上20元邊，但畢竟月內累升幅度甚大，高位現回吐亦屬正常，較穩陣係等候調整，喺16至17元水平分注入場，15元乃重要支持，季內目標向上回補去年三月下跌裂口位20.25至21.45元。