樓市出更：屯門盤愈來愈價細

樓市負面情緒高漲，無論成交或放盤價都減到唔識停，劉Sir一向最關注等待上車嘅升斗市民，所以向祥益老友打探屯門200萬元以下細價放盤情況；不出所料，同類細價放盤由舊年八月僅約1,100個的低位，回升28.2%至現時約1,410個。放盤平咗，細價成交比例自然增加。該行截至上月最新數據，屯門細價成交比例高達77%，係近一年最高，照目前市況，今個月真係隨時突破八成都唔奇。

舊年樓價都幾硬淨，細價放盤買少見少，但呢幾個月二手市場走貨速度真係「慢過蝸牛」，業主要出貨實在唔減價唔得。扎根屯門區已一段日子嘅祥益老友謝澤銘畀咗份數據劉Sir睇，屯門區200萬元以下放盤，由舊年八月1,100個低位，反覆回升到現時約1,410個，增幅達約28.2%。

八成交易不足200萬元

其實細價盤多咗，好大程度係因為屯門唔少200萬元「關口位」放盤減價，唔使講太遠，就用區內龍頭二手盤屯門市廣場舉例。呢位老友話，該盤2座中層D室，面積432方呎，今個月中叫價仲係205萬元，依家已經減至195萬元放盤。

唔止細價放盤回升，同類成交佔整體比例亦見增加。劉Sir參考該行數據，截至舊年十二月最新數字，屯門區200萬元以下買賣，佔該行促成嘅成交比例高達77%，按月增約7個百分點，對比舊年五月錄得僅57%低位，更足足升咗20個百分點。如屯門市廣場1座中層H室，最近由215萬元減至190萬元易手，區內細價成交咁又多咗一單。

劉Sir認為，市況短期內幾難復甦，細價供應只會有增無減，同類成交比例衝破八成只係時間問題。唔只新界區，相信市區細價成交都會增加，好似近日牛頭角淘大花園就有極低層單位以約198萬元交吉轉售，睇嚟準上車客係時候儲定「彈藥」部署買樓。