股海實戰：中國鋁業具重估誘因

內地繼續積極投放資源以解決市場流動性緊張嘅問題，見尋日Shibor拆息全線回落，A股及港股均升逾1%，眨眼恒指已直逼兩萬點關。大戶挾淡倉，上到呢啲水平，冇道理放生班熊仔，所以有理由相信，短線恒指可順利重上兩萬點關，為龍年股市開個好頭！

執筆時傳來外電引述消息指，國務院正在審議有關允許養老金入市嘅提案，更指擬獲准進入股市嘅資金，最多達到570億美元，若然係堅料，A股今鋪真係有望翻身。難怪見到近期國企指數可以一洗頹風，已重上11,000樓上，一旦確認重上去年八月初大跌市前嘅水平，相信仲會有一浸爆發力！

太陽能股全面做好

個股方面，尋日內地傳媒報道，相關部委正研究將太陽能類產品納入家電下鄉政策的激勵產品，消息刺激太陽能股做好，其中保利協鑫（03800）再度發力，突破了上周高位，收報2.69元，升8.9%，成交多達7.38億元。老實講，阿莊都識唔少股友揸住呢隻「蟹貨」，有咁大動力推上，似乎經已消化咗大部分沽壓，短線有力一試2.8至3元阻力區。

市況稍為好番啲，上市公司不忙把握機會抽水。聽聞六福（00590）擬以先舊後新方式，配股集資約10億元，配售價較昨日收市價32.35元折讓約6至9%。

阿莊記得，上月初六福才配股集資11億元，咁快又再抽水，顯見近年公司擴充內地業務令資本性開支大增，真係在在需財！

回說尋日叫大家留意高啤打股份，如金融股及商品股等，阿莊就認為中國鋁業（02600）值得一試，尋日收報4.02元，升5.79%，成交2.45億元。

上周美國鋁業料今年經營前景改善，國際同業有此睇法，對中鋁當然係利好消息。再講，中鋁去年第三季未經審核業績，純利5.54億元（人民幣．下同），按季大增逾五倍，主要受惠產品銷售及毛利率同步上升；首三季純利9.67億元，每股收益7.2仙，保守計，全年每股收益唔難達9仙至0.1元，即較坊間估計嘅7.8仙為高，可見此股存在重估誘因。短期喺3.65港元有不俗支持，目標上試4.7至4.9港元阻力區。