樓市出更：代理意頭價利是谷開單

送兔迎龍！又到農曆新年長假期，雖然樓市例牌淡靜，但唔少地產經紀都年終無休，實行開單無停手，由兔年一直開單到龍年；部分代理行更有「開單」利是，鼓勵喺過年期間開到單嘅經紀，而美聯就有意頭價680元開單利是，畀初一、初二做到買賣成交嘅經紀。

美聯集團執行董事兼集團住宅部行政總裁陳坤興同劉Sir講，農曆新年就到，但集團繼續秉承「全年無休」嘅傳統，所有銷售團隊於初一、初二期間照常營業；而住宅部全線分行，到大年初三就會正式啟市。

過年開單 美聯派680元

陳坤興又話，為鼓勵旗下經紀把握龍年商機，凡喺初一、初二開單嘅經紀，連續兩日都會有開單利是，凡喺期內打響頭炮，簽到買賣成交嘅代理，可獲680元好意頭開工利是；另做到租務嘅都有380元嘅開工利是。

至於同系香港置業，該行高級執行董事伍創業都話，旗下分行及員工部分喺年初一都會開工，但到初三就會全線啟市。而過年有開單嘅經紀，公司亦都會有開單利是。

事實上，多個新盤喺新年照賣樓，代理同時作出配合。利嘉閣地產總裁廖偉強話，初一部分有新盤賣嘅地區，都會有員工當值開工，住宅分行喺初二都會營業，而唔理簽買賣單定租單，經紀開單即有500元開單利是，次數不限。

至於中原雖然部分分行喺年初一會休市，但個別地區分行仍會照開，特別喺有新盤賣嘅地區。

例如該行將軍澳區營業董事譚桂貞同劉Sir講，上年每間分行只返大約四分之一人手。但今年由於區內有新盤，過年時候繼續開盤，故今年要增加大年初一返工人手，加到大約二分之一人手。而除分行有人手外，亦會調派經紀去中環售樓處。