短炒倉：英錶 大有反彈空間
廣東道名店「禁攝」事件，店方終於不堪群眾壓力，要道歉打完場，但由這次事件引伸出來的中港矛盾問題，就真係考起特區高層。有睇過《悲情城市》都知，當年台灣「二二八」事件都係由拉小販呢啲小事引起，但所引致嘅省籍衝突問題，過咗幾十年，到今時今日都仲未化解到。不過凡事總有兩面，從正面睇，呢次事件再次印證咗，大陸豪客源源不絕，做奢侈品生意真係好好搵。
英皇鐘錶珠寶（00887）截至去年六月底止中期盈利勁升1.59倍，至2.55億元，期內毛利率升4.3個百分點，至28.6%，不過股價去年下半年於1.84元見頂後，反而隨大市持續向下，到去年十月的0.72元才見底。由中期業績所見，集團逾八成營業額來自本地，溢利增長幅度亦最勁，達1.1倍，而佔整體營業額一成多一點的內地業務，溢利增長亦逾九成，展望全年業績應可保持強勁增長。
昨日英錶股價升3.1%，以全日高位0.98元報收，升穿20日線，已初步確認本月初的0.81為底位，憧憬春節假期消費，配合大市氣氛向好，股價料有進一步反彈空間，阻力1.16元，支持位0.9元。
