股海實戰：金隅雙重受惠買得過

兔年已近尾聲，本月以來恒指累升幅度達6%，算係為呢個兔年股市畫上一個冇咁難睇嘅「句號」。「吐」夠了，即將踏入龍年，希望股市可以「生龍活虎」！

近日市場流傳，內地養老金入市最快可於首季分階段實施，惟見前日急升過後，尋日滬綜指升上2,300點樓上即現沽壓，結果回落至2,266點收市，跌31點。事實上，論估值，A股已屆吸引水平，只係如今上大人唔會再畀個市坐火箭！

從另一角度睇，內地十二月M2增長按月上升0.9個百分點，至13.6%，顯示市場流動性確實有所改善，否則唔會有今日嘅局面。內地M2增幅擴大，對港股係一個正面訊息，皆因過去內地M2增幅與港股表現成正比，嚟緊幾個月可以確認到M2是否真的見底回升，投資者可多加關注。

睇好還睇好，上半年股市仍存暗湧，例如內地政府換屆及香港特首選舉，以及二至四月歐盟有逾萬億歐元債務到期需要進行再融資，所以若然呢期上唔切車唔緊要，年中前總有上車機會！

一如所料，內險股追落後，中國人壽（02628）升1.69%，但原來上月底阿莊提及嘅新華保險（01336）表現更亮麗，一度逼近招股價28.5元，收報27.85元，升7.95%，回吐至27元邊或樓下，要認真考慮一下。

基金放棄防守策略

市況回穩，基金忙於調整組合，故見實力股高位承接力強、落後股陸續發力，但部分近日股價受壓嘅股份就未見起色，如聯通（00762）及中電信（00728），尋日均逆市跌逾3%。似乎基金已一改去年下半年嘅防守策略，沽出中資電訊股，重投較高啤打嘅金融、商品等股類。

此外，水泥股亦係可以注視嘅板塊。北京市政府表示，今年會積極推動保障房建設，並會引導社會資金投入，消息對主營北京市水泥市場，並涉足保障房建設嘅金隅股份（02009）可謂雙重利好。

雖然預期今年金隅嘅水泥銷售增長或略有放緩，但價格走勢靠穩，加上保障房業務可看好，整體前景仍然樂觀，現時股價仍處底部，近兩日成交大增，Buy side不難見到大戶手影，候調整到5至5.2元水平，可留意落注機會，下一個較大嘅阻力喺6.3元，支持位喺4.65元。