私樓落成量舊年又肥佬

政府近年加快推地，但畢竟批地到落成都要一段時間，所以舊年私人住宅落成量始終偏少。劉Sir參考代理一份數據，舊年最終有9,640個私宅單位落成，其中大部分來自沙田及馬鞍山區，總共約2,710伙落成，但整體落成數字比起一○年仍大幅少咗約28.1%，亦為歷年第三次未能達到1萬伙。

雖然發展商近年吸納唔少官地，但對增加住宅落成實在難以立竿見影。中原一份數據顯示，選取全港58個去年落成嘅私人住宅項目，期內落成單位約9,640伙，未能達到政府舊年年初預測約10,675伙水平，相差約9.7%。

新界落成量佔逾七成

劉Sir發現，期內唔少落成單位都集中於某一、兩個大型項目，因而推高該區落成數字；好似沙田同馬鞍山區舊年就達2,710伙落成，長實（00001）馬鞍山天宇海落成單位就佔1,143伙。

其次，將軍澳區落成量亦有2,444伙。區內嘅長實領峯同新地（00016）天晉，就分別錄1,416及1,028伙。單計上述兩個分區，就合共有約5,154伙單位落成，佔整體落成量約53.5%。另外，旺角及元朗區落成單位，亦分別有1,087及994伙。

籠統地統計三個主要地區落成數字，亦以新界佔6,931伙最多，佔整體約71.9%。至於九龍及港島分別有1,628及1,081伙。另一方面，雖然舊年落成數字未達政府預期，但其實部分地區最終落成量都同估計唔係相差太遠。

西貢將軍澳遠遜預期

好似政府舊年估計沙田有約2,701伙單位落成，與該行統計數據指出嘅落成量2,710伙相若。至於預期約1,096伙落成嘅油尖旺區，都只係差9伙就可以達標。

反而西貢（包括將軍澳）落差就較大，劉Sir相信係使整體落成量未達標嘅「元兇」。政府當初預計該區有3,615伙落成。該行數據統計指出，將軍澳及西貢落成量合共約2,453伙，少1,162伙。