股海實戰：波司登有力見3元

全國金融工作會議上，溫總一句「提振股市信心」，A股即時生猛番晒，滬綜指高位做2,226點，收報2,225點，升62點，兩市主板成交重上1,000億人仔樓上，算係一洗頹風！

好明顯，上大人都覺得依家投資者對A股缺乏信心，要做啲嘢穩定人心。不過，港股尋日又嚟個「蠱惑的市」，A股收市前港股仲係「半死」狀態，跌百多點，但三點過後恒指止跌回升，高位見18,884點，收報18,865點，升272點，成交額476億元。

留意低吸A50機會

內地金融板塊回勇，平保（02318）50元大關失而復得，國壽（02628）以全日高位19元收市，招行（03968）及交行（03328）分別升4%及3.9%。阿莊依然相信，打從去年末季人行減存準率及匯金入市買四行A股，已可確認政策「微調」，但參考對上一次政策轉向，喺政策調整後三個月股市仍喺低位徘徊，之後才逐步回升，阿莊已上車買入首注A50（02823），並會留意低位增持嘅機會。

其他異動股方面，尋日波司登（03998）股價以高位2.44元收市，升幅8.44%，成交5,364萬元。眾所周知，波司登主要銷售品牌羽絨產品，以一○年度銷售額計，公司四大羽絨服產品喺內地嘅市場份額達到36.7%。每年十月至翌年二月都係其銷售旺季，適逢今個冬季天氣寒冷，相信核心業務會有理想表現。

不過，公司未有因此停步，反而積極拓展其他服裝市場，例如去年斥資8.9億元人仔收購女裝公司。按公司中期業績預計，到一二年度，旗下「波司登男裝」喺全國嘅零售點會達到一千個。

多元化嘅發展平台，不但有助分散風險，亦有助提升估值水平。以波司登現價計，往績市盈率十二倍，市帳率2.3倍，呢個估值與利豐（00494）母公司最近向服裝股漢登（00448）提全購嘅作價估值唔差太遠，但波司登嘅主營業務已喺內地市場擁有領導地位，加上實施多元化產品策略，有條件享有較高嘅估值，中長期合理價睇2.8至3元，2至2.2元乃主要承接區。