文禮苑貼市嗌億二

南區、山頂洋房相信係唔少港人嘅Dream House，近幾年更加吸引內地大款搶購，搞到呢類物業近幾年樓價好似坐直升機咁，唔少業主即使願意放盤，叫價亦屬天價。不過，隨住近半年樓市調整，個別業主亦開始以貼市價放盤，好似深水灣文禮苑40號屋最近攞出嚟標售，意向價1.26億元，呎價約3.5萬元，以單邊屋嚟講都算吸引。劉Sir仲八到，「美人」鄺美雲之前曾經住過呢間屋。

世邦魏理仕投資部主管及執行董事鍾德堯話，今次標售嘅文禮苑40號屋，面積約3,594方呎，客廳同睡房面向壽臣山及海洋公園，享有開揚翠綠景，內櫳有3間睡房、客廳、飯廳、偏廳及獨立車房，天台配園林設計，間屋早兩個月推出以嚟，已經獲中港商人同老牌家族預約睇過。

至於業主係本地人，依家意向價1.26億元，呎價35,058元，由於今次間屋位處單邊，所以比舊年底以呎價約3.4萬元賣出嘅29號屋仲吸引，而截標日期係二月十五日。

文禮苑不乏名人業主

文禮苑一向有唔少名人業主，好似之前賣咗嘅29號屋，原業主係恒地（00012）主席李兆基個女李佩儀或有關人士。

至於今次40號屋個業主傳聞是一家上市公司主席。據聞，鄺美人同佢隻愛犬Cash喺呢間屋亦曾住咗多年，一直到前年以約4,000萬元買入九肚山寶松苑一幢面積約3,500幾方呎嘅大屋先搬走，而文禮苑間屋嘅業主十幾年前以約2,750萬元買入，若以意向價賣出，帳面有接近1億元利潤。

內地客追捧逾億洋房

其實近幾個月，雖然樓市氣氛比較差，但逾億元嘅洋房始終有一定需求，而唔少買家更係內地富豪。好似中國海外（00688）舊年底以1.8億元賣出嘅九龍塘牛津道一號一幢雙號屋，呎價24,685元，買家叫馬力農（MA LINONG），同內地山西煤業商人同名。

「體操王子」李寧，前排以3億元賣出持有嘅南區香島道33號單號屋，以洋房面積6,079方呎計，呎價49,350元，而買家係LINKFUL SHARES LIMITED，市場曾經傳聞買家係賭王何鴻燊家族成員。