股海實戰：中石化候回吐吸納

美國上月失業率跌至8.5%，乃○九年二月以來新低，消息正面，但美股道指喺12,500點關前卻步，收報12,359點，跌55點。今年係美國大選年，美股突破去年高點，為奧巴馬爭取連任造勢嘅可能性不能抹殺，但面對美股偏強而A股偏弱嘅港股應如何自處，就要做事後孔明！

元旦假後，除了首個交易日紅盤高開之外，港股表現疲弱，上周五恒指更一度跌穿10日線，啱啱好回補了新年首日嘅上升裂口位，慶幸最終恒指企穩10日及20日線樓上收市，報18,593點，埋單首周仍有158點進帳﹗

股市有幾乾塘，睇上周五市況便知一二。中午市場突然傳來北韓核漏事故，南韓股市一度跌逾2%，但日本及南韓迅即表明未有聽聞，南韓股市跌幅收窄。換着過去大、小戶皆活躍嘅市況，呢啲消息隨時造就恒指一、兩百點波幅，但實情此期間港股冇大反應，反映魚缸人氣真係到咗冰點！

恒指萬九點關遇阻，買上動力不足，仍然有做嘢嘅大戶開始試沽。上周五見大市沽空額達46.22億元，大市沽空比率10%，其中中石化（00386）居首位，沽空金額3.5億元，沽空比率24%。

三大油股支撐大市

講開又講，上周升市，都係多得三大能源業巨頭：中石油（00857）、中海油（00883）同中石化開個好頭，事緣財政部調高暴利稅起徵點，變相為三大巨頭慳番唔少稅務支出，有助抵銷成本上升嘅壓力，故引來多家大行為三大巨頭發報告唱好。事實上，今次財政部上調暴利稅起徵點嘅目的，不外乎係促使油價企喺合理水平，為改革成品油定價機制創造條件。阿莊相信，下一個刺激中石化股價嘅利好因素，正係內地上調成品油價格及相關機制改革嘅消息，亦不排除剛斥逾百億元喺美國收購油氣資產權益嘅母公司中石化集團，會向其注入海外油氣資產，這些因素都可抵銷煉油業務虧損嘅負面影響。

上周五，中石化股價曾高見8.98元，乃五十二周新高，收報8.81元。基本上，呢一浪由上月中約7.8元起步，升至上周高位，累升15%，短線有獲利回吐亦好正常，故若然手頭尚未有貨，不妨候回試8.5至8.6元承接，再睇位行事。向上以大成交突破9元的話，下一阻力位可上移至9.5元，10日線支持喺8.3元。