樓市出更：招標賣地任人玩神秘

政府今季繼續「一刀切」將六幅計劃出售嘅土地悉數以招標形式出售，引來業界批評此種賣地方式欠公允，兼且無透明度，更縱容財團「執死雞」。劉Sir睇番近幾次招標，部分入標發展商同私人投資者都係用海外註冊公司名義買地，根本無從得悉買家真正身份。

早排有幾幅政府招標地皮都由海外登記公司買入，包括啱啱响去年十月底賣出嘅港島南灣道近35號豪宅地皮，成交呎價三萬八千幾元，係政府賣地樓面呎價歷年次高，但成交價只係約5億元，比估值上限價6.38億元，低咗1.4億元。地皮買家Ultra Well Group Limited，至今响公司登記處都係無資料，身份極度神秘。事實上，港島豪宅地成交價都唔超標，如果塊地透過拍賣推出，個價一定唔會咁平。

應公布買家母公司

另外，早前截標賣出嘅大嶼山長沙兩幅住宅地皮，由Bao Wei Enterprises Limited一口氣買晒，成交價加埋3.6億元左右，平均樓面地價五千五百幾元，比起○七年信置响同區買入嘅地皮呎價六千七百幾元，平咗千二元一呎，間公司資料同樣查唔到，事後地政總署查咗一輪，先話母公司係太古地產。

政府回應話，公開招標或者公開競投方式出售土地，一向都無設限制，無話唔畀海外公司參與；劉Sir認為，發展商賣樓花申請預售時，都會公布埋母公司係邊個，點解土地招標就唔使，市民有權知道買入地皮買家係咪有能力完成項目，不過政府就無回應。

業界希望恢復拍地

局長喺公開場合解釋，地政總署係用一個非常專業嘅方法，估咗地價再保證係市價作為底價先會賣出地皮。所以招標同拍賣都符合公平同公正原則。

其實地產建設商會早前趁政府制訂新一年賣地計劃收集意見之時，已經反映過招標推地透明度低，希望可以恢復拍賣地皮。不過，發展局局長林鄭月娥仍然一意孤行，將會推出嘅六幅政府地皮，繼續係用招標形式。