Fundman睇市：石油股投資組合必備

話二○一一年係投資界名牌芬佬的英雄塚，應該無人反對，債王格羅斯因為賭QE2後無人有興趣買美債，搞到旗下Total Return fund在美債大升之下，跑輸大部分債券基金，結果去年首次錄得淨贖回，英名盡喪。歐洲股神安東尼波頓同沽神保爾森，都分別因民企危機及錯估美國經濟復甦，去年被金融洪流沒頂，連港人MPF都錄得成立以來最差表現，平均跌8.41%（筆者自己份MPF更縮水接近四分之一）。

要簡簡單單搵到固定回報，其實唔係想像咁難，長期而言，定期存款平均都有2至3厘，睇番恒指今日18,813點，同十一年前16,900點唔升得好多，但計埋期間派息再投資，平均都有接近4%回報，已經比十一年來MPF累積平均回報2.71%優勝，而且愈來愈多REITs供選擇，都係適合作為退休保障投資之選，最衰政府在強積金自由行上延而未決，搞到港人繼續被迫畀生意一些表現差劣的管理公司，白𢭃管理費。

內房股避之則吉

周四，內地官員陸續放風，指春節前放水機會極微，A股股民最後一點懸念亦告失去，滬綜指free falling，尋日跌20點，報2,148點，收市指數創○九年三月以來最低。儘管港股嘗試擺脫內地股市的影響，可惜塘水滾塘魚的成交額下，作為唔大，恒指升86點，報18,813點，全日指數高低位18,821及18,723點，波幅連100點都唔夠，只有98點，主板成交縮到得370億，但淡友卻未有手軟，沽空成交38.8億，佔總成交比例由前日的8.1%升至10.4%。

受缺水影響，首當其衝的是內房股，方興地產（00817）跌4.5%、世房（00813）跌3.6%、人和（01387）跌3.5%、龍湖（00960）跌3.3%。綠城（03900）公布十二月銷售額按年大跌44%，只有57億元（人民幣．下同），全年累計銷售額比一○年跌35%，只有353億元，儘管十一、十二月銷售大跌早乃市場共識，但股價仍要大跌7.2%至3.08元，其他內房未來幾日會陸續公布十二月銷售數據，睇情況仲係避之則吉。

歐債危機同○八年美國次按風暴，對商品價格有截然不同的影響，○八年紐約期油在雷曼爆煲後，曾經跌至32美元，今次油價卻相當強勢，去到80美元經已拒絕再跌，近期借伊朗局勢令地緣政治風險升溫，更重返100美元樓上，若非市場估計全球石油需求很快會因為經濟恢復動力而回升，這一波油價升勢，只能解讀為商品市場深信，歐央行最終會以類似美國聯儲局印銀紙的方式去解決當前危機，可以預期，在目前疲弱的經濟基礎下，油價當且可堅持於80至100美元水平，一旦歐美經濟數據出現曙光，油價恐怕會易升難跌。

昨日恒指86點升幅，40點來自三隻中資石油股，看來基金經理在資金缺乏出路下，都寧願跟大環境，將部分資金轉到資源股身上，中石油（00857）及中海油（00883）兩隻上游業務比例高的股份，估值目前都頗吸引，從客觀環境看，筆者相信或多或少都應將中資石油股加進今年的投資組合內。