股海實戰：李寧調整期尚未完結

金魚缸繼續悶局一場，恒指高低波幅唔到100點，雖然收市仍升86點，但僅中石化（00386）、中海油（00883）、中石油（00857）、大笨象（00005）同中移（00941），升幅合共已相等於恒指升79點，即係話大戶齋做5隻成分股，經已輕易完成任務！

據報商務部部長陳德銘喺尋日召開嘅全國商務工作會議上表示，今年將總結「家電下鄉」和「以舊換新」嘅經驗，研製替代接續政策、研究節能環保產品消費扶持政策，並以廢棄舊商品回收利用為重點，提高廢舊商品回收和再利用水平，另會促進網絡購物等新型消費業態發展。

期待補貼政策續集

在憧憬產業補貼政策有「續集」之下，尋日個別家電股繼續走高，創維（00751）及TCL多媒體（01070）升幅介乎2至3%。若然未來政策鼓勵網絡購物，專門做百貨店確實可能會少咗生意，業界如何應付尚有待觀察。事實上，近年唔少大型零售商都察覺到消費模式轉變嘅問題，部分除咗繼續搞地舖分店之外，還實行兩條腿走路，開設網站平台以迎合網上購物模式嘅興起，就如國美電器（00493）旗下設有網上商城，據講曾創下在線支付兩小時內做5,000萬人仔銷售嘅紀錄。

講開零售股，見到龍頭體育用品股李寧（02331）股價喺6元水平徘徊咗個多月，上周開始緩緩上升，尋日高位做6.74元，收報6.68元，升3.7%。

阿莊依然深信，過去幾年由投行催谷出嚟嘅體育用品股板塊，靠不斷增設分店來狂谷估值，跟當年科網股靠點擊率來計算身價有異曲同工之妙，但結果係點，大家都清楚。去年各大體育用品股都開始要面對存貨積壓同銷售增長放緩嘅問題。鑑於今年上半年內地經濟增長頗大機會持續放慢，消費市道勢受影響，否則上大人唔會呢頭讓「家電下鄉」同「以舊換新」措施按預定期限停止，嗰頭又話要再研究優化措施，故阿莊相信，今年體育用品股仍處「寒冬」，業績將顯著受壓。

以龍頭股李寧為例，股價自一○年高位累跌近88%，跌夠未？阿莊亦唔敢下判語，但可以肯定嘅係，業內必須要大洗牌，再經歷一年半載嘅調整期，始能重現出路，此前股價應屬有波幅但冇升幅格局！