樓上舖逆市搶到「巔」

年近歲晚，亦意味樓市步入傳統淡季，好多住宅業主都唔係咁易沽到貨，不過舖位物業就似乎完全唔受影響，尤其位處旺區一線舖位，做價更加有驚喜。

好似尋日透過私人拍賣行推出嘅旺角西洋菜南街銀城廣場一個樓上迷你舖位，成交呎價高逾4.8萬元，相信係歷來樓上舖新高。

市況淡靜，住宅交投量急凍，除咗代理行生意勁跌外，連私人拍賣行生意亦見淡薄，但係工商物業仍然旺場，環亞拍賣行曾傑俊同劉Sir講，尋日拍賣銀城廣場一個單號樓上舖，實用面積僅27方呎，仲唔係近電梯位，連約開價115萬元，最終以130萬元拍賣成交，呎價超過4.8萬元。

時裝舖回報4.6厘

劉Sir翻查同區商場舖位資料，發現舊年CHICの堡商場1樓舖位，去年中錄得每方呎逾2.75萬元成交，當時已經創出該商場呎價新高；有代理老友講，附近嘅好景商場依家每方呎大約3萬多元，足見今次呢個舖位成交價理想。

曾傑俊話，上址依家做緊時裝店，每月租金約5,000元，位置雖然未算最優質，但按成交價130萬元計，租金回報率亦達4.6厘，都幾可觀。據佢所講，原來呢個舖位早前曾經推出拍賣，而業主今次亦將個拍賣開價下調約8%，順利吸引買家出價競投，終較開價搶高約13%成功以130萬元沽出。

荃中翻拍未到價

至於早前調減拍賣開價嘅荃灣中心重慶樓低層C室、同埋太原樓高層B室，尋日喺另一間私人拍賣行再翻拍，開價為168萬同172萬元，雖然經過多口承價至196萬同187萬元，搶高達16%及近9%，但最終未到業主底價而未錄得成交。另居屋物業拍賣成績較佳，天水圍天盛苑C座中高層6號室，綠表價105萬元開拍，並以168萬元成交，呎價約2,917元。