股海實戰:新媒體股刀仔鋸大樹

新年伊始,阿莊祝願世界和平、全球經濟復甦,股市見底回升,股民身家又再水漲船高,老闆有錢賺、員工加人工,唔少得當然係大家都身體健康。

舊年全球黑天鵝事件頻生,例如日本大地震、美債差點違約、歐債危機火燒連環船、美債美元獨強、內地高鐵事故、調控持續、A股尋底等等。時值一年之始,股市尚處低位,上半年經濟增長有持續放緩之虞,加上今年世界各地有大型選舉活動,政治因素令經濟和股市充滿變數。所以,一二年係難以捉摸嘅一年。

歐債危機仍有餘震

正由於變數甚多,年初估晒成年股指波幅,好似有啲不切實際,不如先睇首季表現。由於去年下半年全球經濟轉差,相信首季企業宣布的去年度業績表現利淡居多,但現時估值某程度亦已反映呢項因素。外圍方面,歐債危機最急最痛嘅一役,相信經已喺去年出現,今年上半年尚有餘震,但相信規模較小,而美國經濟數據持續有改善,對美股起支持,雖然表現好好就唔講得,但應暫可排除大散之虞。

年初祖國焦點不離中央一號文件、全國金融工作會議,以及人行會否如期喺春節前再減存準率。阿莊估計,喺上大人再一次放水之前,滬綜指會繼續反覆走低,滬綜指或會下試2,000至2,100點區域,而反彈較大阻力喺2,400點水平。

至於港股,阿莊預計首季恒指波幅介乎17,200至19,200點,股票方面,穩穩陣陣嘅當然係收息股,領匯(00823)、中移(00941)可以視為股膽。至於可繼續睇位炒上落嘅長青股,則有消費股華創(00291),以及受惠三網合一嘅聯通(00762)及聯想(00992)。

想刀仔鋸大樹,阿莊相信指集新、舊媒體、合資訊、娛樂於一身嘅新型媒體股,遲早會大炒一轉,而今年新華網及人民網能否順利登陸A股將成關鍵。港股中,與人民網有合作兼且已獲騰訊(00700)入股嘅文化中國(01060),仍然係阿莊久候嘅炒作對象,而去年獲新華分社亞太總分社入主嘅新華通訊頻媒(00309),亦屬冷門之選。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

阿莊

集資訊、娛樂事業於一身的內地新媒體股,今年有機會成熱炒對象。(資料圖片)