樓市出更：細行搶街坊客鬥搬大舖

二手樓市進入「冰河期」，交投嚴重萎縮，地產代理搵食愈見艱難，代理裁減潮已經展開，部分具規模嘅大型代理行，都相繼傳出已有「削舖」同「裁員」行動；不過，劉Sir留意到，個別「皮費」較低嘅新界區中小型地產代理行，反而無懼淡市，逆市擴充，反擊大行，好似金龍地產、六福行同祥益地產等，近日都有擴充大計。

向來活躍於上水、粉嶺嘅金龍地產，喺逆市下竟然細舖搬大舖，並滿肚擴充計劃。該行馮宇成同劉Sir傾開，話因為之前間舖只有160幾呎，近排公司又請多咗幾個同事，發覺間舖太細唔夠坐，咁咪即刻搬間大舖；依家新舖有成460幾呎，請多咗3個新同事，隨時坐多幾個都得！

細行富人情味易留客

馮宇成話，大行同細行嘅經營手法唔同，細行較有人情味，唔同大行流水作業嘅經營方式，喺旺市細行較難請到人，相反趁現時淡市可吸納多啲由大行出來、有經驗嘅代理。有其他資深代理話，其實細行較易同班街坊客打成一片，逆市下更易取得市佔率，有生意自然唔怕加人加舖。

另一間扎根粉嶺區嘅六福行吳家榮就話，最近同區部分中型行結業，流失咗唔少有經驗人才，近排已重新吸納咗2至3人。依家公司有兩間分行，分別係粉嶺中心同牽晴間分行，未來打算喺同區花都廣場再開多間分行，投資大約50萬至70萬元左右。佢話小型代理行架構簡單，「皮費」易於控制，所以容易逆市擴充咁話。

祥益揼本奪嘉湖靚舖

而向來喺西鐵站沿線屋苑發展得極具規模嘅祥益地產，近排都喺天水圍再租舖加行，該行董事謝澤銘同劉Sir講，佢地經過兩輪投標後，終於以每月約9萬元，擊敗其他對手，簽下天水圍嘉湖山莊銀座商場內，一個建築面積約352方呎嘅舖位，呎租高達256元。

據了解，呢個舖上一手租客係一間大型地產代理行，由於位置夠靚，一向都係兵家必爭之地。謝董仲話，擴充其實係配合公司嘅發展，同埋淡市較易吸納靚舖，而未來公司亦有計劃再請50人。

事實上，唔少大行早前已傳出減人、減舖嘅消息，尤其喺東涌、屯門等新界地區，近日又再傳出有大型代理行裁員。