股海實戰：利豐守上升軌諗得過

本來，美國經濟疲弱，只懂開印鈔機累街坊，美股應該睇跌，點知時近歲晚，屈指一算，今年起至本月廿七日止，道指升咗6%；反觀經濟仍錄得增長嘅中國，滬綜指同期卻累跌22.8%。再睇匯市，美國經濟差，美元點睇好？誰知就係得美元獨強。總而言之，今年啲嘢應跌唔跌，應升唔升，用正常思維去進行投資，分分鐘要輸身家！

A股不知何處是底，滬綜指尋日落過2,134點，午後始告反彈，收市微升3.8點，報2,170點，滬、深主板總成交唔到八百億元人仔。正由於今年A股市場表現差勁，聽聞唔少內地券商年尾分紅都大縮水。至於香港同業亦唔好受，無論大、中、小型券商，日子都係咁難過，睇見呢兩個月啲投行為交數連細晒士嘅新股都照做保薦，破發亦由它，反正面子唔值錢，便可知一二！細行唔使講就更加難捱，雖則話證券行業一向都係好天斬埋落雨柴，但大淡市加埋延長交易時間，真係傷上加傷，若然出年搞埋晚市期指，生意日減而成本日增，唔排除又有細行被叮走！

乳品股再受重創

自毒奶事件後，大家都以為內地乳業已痛定思痛，進行徹底改革，誰知又再出問題，已獲中糧集團入主嘅蒙牛（02319），產品被驗出致癌物質超標，幸產品尚未流出市面，但事件足以再次打擊消費者對內地乳製品嘅信心。蒙牛股價尋日最多挫26%，收報20元，跌23%，成交15.6億元。

連龍頭企業都可以一錯再錯，顯然行業改革欠透徹，難道中國只懂做生產大國，就係冇能力搞好食品安全？咁落去足以拖累整個內地食品股板塊，未來估值都要負上不必要嘅風險溢價，且每次出現事故，都會對品牌造成嚴重傷害，冇三、兩年都難以復原，投資者沾手相關股份宜注意風險。

講到美國，呢期公布嘅數據都由谷底反彈，升勢係咪持久仲要等着瞧，但喺呢個大淡市中，少少正面消息都經已好難得。出口股利豐（00494）自十一月以來股價三次回落至13.8至14元即見支持，目前尚處於八月低位延伸嘅上升通道，若然真係要用反智慧來諗，嚟緊美國經濟數據持續偏向正面，出口股可以關注，股價正處上升通道底部嘅利豐有得諗，主要阻力仍然喺17元，跌穿13.8元止蝕。

順帶一提，阿莊上周提到心思思想買些少中國銀行（03988），博明年初內銀可以動用新嘅信貸額度，尋日排咗2.8元買入20萬股，但隻股最低只見2.85元，睇吓呢兩日買唔買到貨。