魚缸Blogger：中海集運走勢強橫
雖然滬綜指尋日倒升守住2,170點收市，可惜港股唔爭氣，跌110點報收，不過尋日推介嘅中國安芯（01149）就逆市升逾4%。另一邊廂，美國假期零售創3.6萬億美元新高、傳統年頭航運旺季亦將至，今日就順勢睇隻中海集運（02866）。
中集運今年頭三季仍蝕15億元人仔，但近日宣布出年將調高多條航線運費，加上早前集團同全球最大航運巨頭馬士基相繼訂購新船，料可為航運業出年嘅盈利前景帶來一點曙光。雖然幾可肯定，中集運今年全年盈利表現將不堪入目，但炒股最緊要有勢，該股尋日確認企穩喺三個月阻力樓上，下站阻力可睇2元，支持1.7元。
中海集運（02866）
阻力位：2.0元
支持位：1.7元