樓市出更：舊樓強拍旺角最旺

雖然政府頻頻增加土地供應，但發展商仍密密手响市區收購舊樓以增加土儲。回顧今年土地審裁處收到嘅舊樓強拍申請可謂相當熱鬧，更創下歷年最多，直至尋日已經有總共46宗申請，較舊年全年21宗增加1.19倍，而當中四成八個案，更加係引用超過八成業權便可申請強拍嘅新例入稟。

劉Sir睇番啲資料，今年旺角及大角咀一帶是發展商最積極收購嘅舊區，加加埋埋有成11宗，其中8宗係用八成業權新例申請，該區受歡迎原因可能係呢區樓價差距較大有關。

德昌街分六個案入稟

因為區內奧運站一帶樓較新，二手呎價都要成一萬元，優質啲嘅單位更萬幾二萬，與一街之隔嘅舊樓，講緊呎價四千幾、五千元，兩者相差一倍或以上，所以特別受發展商追捧。

其中同旺角富榮花園只有一條馬路之隔嘅德昌街，有財團將收購範圍內多幢舊樓分成6宗個案入稟申請強拍，而每宗個案又啱啱好合新例，樓齡夠五十年以上，而財團持有業權份數又達到八成多少少。

至於恒地（00012）亦都向土審處申請強拍大角咀得利街11至33號嘅舊樓。除咗舊樓購併集中响旺角及大角咀外，西環同埋筲箕灣亦都係另一個發展商最感興趣嘅地區，好似西環，可能因為西港島嘅鐵路效應，今年就收到9宗申請；而筲箕灣全年就收到7宗強拍申請，主要係工廠街同教堂里一帶舊樓。

拍賣統一業權創新高

今年有6宗透過拍賣統一業權個案，亦都係歷年最多，涉及金額逾17億元；同時亦有5宗已聆訊完畢，並批出拍賣底價，將在出年透過拍賣統一業權。