市建局奀地年尾趕開單

無論政府主動賣地抑或港鐵上蓋招標項目，大部分都係規模較大嘅住宅發展，搞到啲中小型發展商好難參與。不過，向來係市區細地「供應商」嘅市區重建局，終於打破沉默，事隔一年多再次推出重建項目，推出嘅項目係土瓜灣浙江街/下鄉道發展項目，市場估計項目值約3.6億至4.5億元，成為中小型發展商嘅「及時雨」。

新一季賣地計劃仲未公布，劉Sir認為，今次市建局突然出手成為發展商「及時雨」，一來唔少市場人士擔心政府推地步伐後勁不繼，二來市區細地供應真係靠晒市建局。

單幢式重建 等足一年

其實該局自從舊年九月底推出大角咀福全街重建項目後，就無任何項目推出，當時大角咀項目就收到多達15份意向書，無他嘅，呢類單幢式舊樓重建後呎價動輒過萬元，唔受追捧先出奇。

市建局今日起就上述土瓜灣重建項目邀請發展商提交合作發展意向書，截止日期為下月六日。

呢個項目佔地約10,011方呎，總樓面約90,204方呎，將興建約116伙住宅，亦提供約15,070方呎商業樓面，並計劃將半數單位限為面積約500方呎或以下小型戶，限制比例相比上次大角咀項目嘅60%略為減低。

高緯環球張翹楚對劉Sir講，土瓜灣重建項目樓面呎價值約4,000至5,000元，即估值約3.6億至4.5億元，規模上未必適合大型發展商口味，估計較吸引中小型發展商關注。

項目限呎 裕泰興忍手

不過，限呎條款始終係發展商嘅考慮環節，好似區內有發展單幢式物業嘅裕泰興地產董事總經理羅守耀話，對市建局等招標項目興趣唔大，因為有「限呎」等條款，投標價又唔平，所以「唔抵食」。宏安地產助理總經理楊桂玲就話，會研究一下先決定會否遞交意向。