股海實戰：上實估值有望提升

上周五下晝A股突然回勇，接着傳聞滿天飛，仲以為阿爺終於出手，點知空歡喜一場，尋日A股打回原形，加上突然傳來北韓領袖金正日病逝，滬綜指曾低見2,164點，尾市始告回順，收報2,218點，跌6.6點。恒指低開231點後，直插至17,821點，收報18,070點，跌215點。一如所料，假期氣氛轉濃之下，大市成交額只有424億元，沽空比例9.7%，料年底前恒指主要波幅維持喺17,600至18,450點。

展望明年，全球將進入多事之年，美國總統大選、中國政府換屆、如今北韓領袖逝世，新領袖年紀輕輕，如何處理兩韓關係，都係未知數。政治穩定係股海牛氣重現嘅大前提，咁睇落明年股海真係難有運行，故投資策略亦要以守代攻，宜維持較高比重嘅現金或定息產品投資，至於股票，當然亦要着重防守性，水務及燃氣股屬可考慮之列。

管理層作風趨進取

講開又講，呢幾年唔少大紅籌都着手去除非核心業務，搞專門事業，如越秀地產（00123）專搞內房、北控（00392）主攻燃氣。至於上實（00363），自○八年前老總退休後，亦見管理層作風開始趨於進取。本來母公司已透過A股上實發展做房地產業務，冷不防後來上實入主上實城開（00563），日後上實城開與上實發展如何分工，仍有待觀察。阿莊仍相信，喺A股市場低迷、內房調控持續之下，上實城開嘅融資活動能力會較強，喺爭取做集團房地產業務旗艦方面有優勢，但亦不排除日後條例許可，上實城開與上實 發展可以來個「二合一」，順道海歸A股市場。

至於其他業務，據講未來數年上實會將水務發展成核心業務，並擬安排旗下亞洲水務在港作第二上市。公司明確專注發展一門具增長潛力嘅業務，有助改變「綜合企業」嘅形象，盈利增長前景及資產質素改善，自然亦有助提升估值。過去三個月，上實股價喺20元關找到支持，加上隻股有5厘息，又有上海市政府做大靠山，每逢股價十四日RSI回落至超賣區域，唔怕買嚟坐！