魚缸Blogger：新奧具追落後價值
金正日死訊一出，即時震散亞太區股市，雖然港股尋日最後力保萬八大關，但阿爺出手救市訊號消失得無影無蹤，後市睇法仍然偏淡。早前宣布收購中燃（00384）後急挫嘅新奧能源（02688）就積極反撲，現價追落後，仍有值博率。
事實上，新奧截至今年六月底止嘅手頭現金有56.5億元人民幣，若收購完成，新奧會係內地最大嘅城市管道燃氣營運商，市場亦估計新奧出年盈利會因而最多推升9%，且新奧今年上半年多賺近18%至6.29億元人民幣，其財務狀況仍屬健康。新奧今年以來股價都喺21至30元區間上落，雖然尋日急升，但股價仍處區間下限範圍，首個追落後阻力可先睇25.8元。
新奧能源（02688）
阻力位：25.8元
支持位：24.3元