屯門車位開價唔使十萬

尋日劉Sir講過車位物業入場門檻一向唔高,同埋回報理想,吸引唔少銀彈唔多嘅八十後入貨。正值大市淡靜,拖累唔受額外印花稅(SSD)影響嘅工商物業都要大幅劈價吸客,使呢類非住宅物業投資變得更加吸引,啱啱就有個屯門錦暉花園車位僅以9萬元推出拍賣,比市場同類叫價低六成六有多。

住宅因為SSD緊箍咒,交投一直向下,但近排連唔受影響嘅工商物業都敵唔過淡市。有代理朋友同劉Sir講,工商物業市場買賣亦開始靜,啲業主都逼住要筍價放盤吸客,一時間市場上多咗呢類平價車位。

錦暉車位低66%開拍

佢話,好似月底喺私人拍賣行推出嘅屯門錦暉花園雙號車位,拍賣開價只係9萬元,比市場一般叫緊15萬至17萬元相差超過六成六。聽區內代理講,呢啲車位每月租金介乎900至1,000元,如果成功以9萬購入該車位,回報率最少去到12厘,認真和味。

劉Sir參考香港置業早前一份數據,雖然近排純車位買賣登記按月回落,但其實今年截至十一月都累積錄得逾7,600宗登記,相信全年數字可以達到約8,000宗,僅次於去年全年嘅8,773宗,成為九七年後次高。

佐敦地舖減價20%沽

而最少喺拍賣場上推出兩次嘅筲箕灣巴色道雙號農地,亦都大幅調減開價,月底翻叮再拍,地段面積1,182方呎,由原來嘅980萬元勁減300萬,至680萬元,減幅達三成。

放售價硬淨嘅舖位物業亦受牽連,要大幅減價先有承接。利嘉閣工商舖郭永康話,佐敦白加士街57至59號地下連一號舖位原先連約叫價8,500萬元,但直至物業交吉放售後,才以6,800萬元售出,較原先叫價勁減1,700萬元,減幅兩成,新買家為朱姓資深舖位投資者。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

本月底屯門錦暉花園一個車位僅以九萬元推出拍賣。