短炒倉：東風 留意低吸機會

正所謂人生有幾多個十年，2,300點政策底一穿，內地股市即時變成無底深潭，話咁快連2,200點都穿埋，滬綜指回到十年前水平，難怪內地股民都死心離場。

市場氣氛全面悲觀下，留意到東風（00489）尋日早段表現強勢，由低位11.5元起步，中午前一度升見12.2元，較上日升近3%，無奈午後市況進一步轉差，東風亦由高位回落，最後平收11.86元，但相比大市及其他汽車股，表現已算相當突出。

講到內地車股，大家都知冇咗國策支持後形勢麻麻，東風中期純利倒退達一成，至58.61億元人民幣，毛利率亦由22.7%跌至19.9%。不過集團近期亦不乏好消息，包括傳與富豪汽車組合營，以及計劃投資300億元人民幣發展自主品牌汽車。而其十一月汽車銷售數據亦見起色，達19.27萬輛，按月升9.11%，同比則增長6.05%，而首十一個月合計，汽車銷售更按年增長11.02%，達196.83萬輛，可見業務已逐步走出「汽車下鄉」及「以舊換新」政策完結後的低迷階段。其股價上月於11元水平有不俗承接，若後市進一步回落至該水平，可視乎市況伺機低吸，阻力位12.3元。

東風（00489）

阻力位：12.3元

支持位：11.0元