內地客好價租轉賣

樓市交投轉靜，但樓價仍然企穩，除咗一班「本地薑」投資者趁機沽貨，連內地投資客近日亦有套現行動，劉Sir聽到市場有消息話，一組持有長沙灣「西九四小龍」超過十件貨嘅投資客，啱啱遇到有買家肯出「理想價」承接，於是沽出其中一個碧海藍天高層戶；另外，亦有鴨脷洲南灣內地業主趁勢減租租出1個一房單位，累減幅度逾27%，呎租約22元。

劉Sir記得上述西九內地投資客喺上年大約三至四月嗰陣，連購多個「西九四小龍」嘅碧海藍天、昇悅居及泓景臺兩房單位，並打算作收租用途，聽人講好似有成11個，嗰陣購入呎價約5,800元。

而近排有人話，嗰批內地業主有意放盤套現，但後來又話想繼續收租。不過，港置文啟光話，其中一個碧海藍天3座高層單位，面積約680方呎，因有買家以「理想價」洽購，最後以約500萬元售出，呎價達7,353元，一年多啲帳面賺咗成70萬元。

南灣放租減完再減

事實上，內地客一向鍾情新盤單位，但收樓後往往因租盤增加，經常出現減租、低租情況。中原盧鏡豪就同劉Sir講，有個內地客一手購入一個南灣10座高層D室，面積大約591方呎嘅一房單位，計劃做「包租公」，响今年三至四月收樓後，就以約1.8萬元放租。

但當屋苑入咗伙後，租盤明顯大增，早前已主動減租至約1.6萬元放盤，但適逢租務淡季來臨，呢位內地業主決定一減再減，最後以每月約1.3萬元租出單位，呎租約22元，比同區深灣軒更低。

呢排市場成日都出現超低租個案，有代理爆料，天水圍嘉湖山莊麗湖居5座有個面積約800多方呎單位，月租僅約7,000元，都算十分「抵租」。