Fundman睇市：恒大地產只宜炒波幅

歐洲央行管委會成員馬庫赫（Jozef Makuch）表示，歐央行唔可以扭曲本身職責，大規模購債或實施類似美國聯儲式的量化寬鬆措施，加上有外電引述，德國總理默克爾夫人「又再重申」反對歐洲穩定機制（ESM）加碼救市，搵消息嚟插的歐洲股市，開得高收day low。之後美國聯儲局議息會，伯南克重申超低利率至少維持到二○一三年中，但就未有暗示QE3的可能性，道指由早段升過百點，到收市倒跌66點，報11,954點，一彈就散，漸漸成為近期歐美股市一大特色。查實近期美國經濟表現唔錯，聯儲局無出招意圖實屬合理，只係歐美股市表現太差，股市投資者對央行出招，抱過分奢望。

中央經濟工作會議，內容都算催眠，去年幾個重點，除控制通脹一項唔見咗之外，其餘穩定增長，社會平穩，改善民生，繼續調控私樓市場，基本係唔使睇都估到。A股跌穿2,300點政策底之後，繼續笨豬跳式「free falling」，昨再跌20點，報2,228點，港股成交也縮到得433億，創十二月份最低紀錄，恒指繼續陰陰乾，跌92點，報18,354點。

新股表現繼續沉淪

超額認購242倍的豪特保健（06880），都只能守住招股價一日就「破發」，尋日兩隻上市新股，公開認購只得0.74倍及0.2倍認購，衰啲講，跌就預咗，但估唔到衰成咁。寶信汽車（01293）收7.3元，較招股價8.5元跌14.1%，此股保薦行係大摩及細摩，可見大牌子不再係新股包贏的保證。不過，最離譜要數花旗保薦的中國多金屬（02133），招股價2.22元，收1.35元，認購者一日輸39.2%！

數今個月上市八隻股票，七隻潛水，得創板股第一信貸（08215）仲有進帳，都算意外，今日規模大得多的周大福（01929）及新華保險（01336）正式登場，暗盤價顯示，捧場客至少要輸5%至可以落到車，認真慘情。

恒大（03333）公布十一月實現合約銷售12.4億元（人民幣．下同），環比跌86%，按年亦跌81%，銷售面積16.5萬平方米，平均銷售價每平方米7,510元。大型發展商紛紛減價，恒大卻出奇地選擇逆市加價20%，是十一月銷售數字急跌的成因，主要係今年首十一個月累計銷售791億元，已經達全年目標1.13倍，管理層解釋加價策略，係為保證明年增長空間的安排。

限購令延續到另行通知，近期股市對中國樓市已無懸念，內地地產商又慣常每年交出高於往年的銷售目標，恒大刻意加價「㩒低」十一、十二月銷售額，等明年做到一個增長的數字，可以理解，事關如果明年內地一手樓價真係好似大行估計，要跌兩至三成，即使要維持同樣的銷售額，地產商銷售樓面要增加三成三，如果要交出兩成增幅，樓面更要多賣六成，以現在內地情況，看來並唔容易。

下半年，恒大只賣樓不買地，相信年終負債比率肯定低於上半年的80%，現價往績市盈率不足四倍，問題係明年業績無增長，甚至出現倒退的機會其實幾高，低殘股價儘管反映現實，但中央政策有轉向迹象前，似乎只適宜在2.5至3.5港元之間炒炒波幅。