股海實戰：北控水務攻守兼備

面對複雜多變嘅外部環境，祖國一於「以不變應萬變」，為期三日的中央經濟工作會議結束，定調明年繼續行穩健貨幣政策。上大人冷眼旁觀，A股喺本地炒家急於撲水以及外資班師回朝下持續受壓，滬綜指跌穿2,300點關後頭也不回，成交低迷，港股亦同病相憐。

明年策略以穩為主

尋日有兩隻新股掛牌，寶信汽車（01293）收市價較招股價低14%，另一隻中國多金屬（02133），收報1.35元，較招股價低39%。執筆時見周大福（01929）同新華保險（01336）暗盤價均低於招股價，睇怕都係難逃潛水命運。講開新華保險，有表叔相告，呢隻係好股，後台夠硬淨，只係市況唔配合，上市後可以逢低分注收集放長線咁話，係真唔係就要放長雙眼！

個股方面，明年中國經濟以「穩」為主，投資者亦要因時制宜，別將目標定得太高。隨着內地經濟持續發展，以及節能環保政策得到進一步落實，水價上調，用者自付，係大勢所趨，環保水務股「錢」景仍然秀麗。最近野村就對一系列水務股進行研究，首選係北控水務（00371），目標價3元。

北控水務係光大國際（00257）之外，另一隻有實力中資機構撐腰嘅水務股，呢個背景令長線投資者揸得安心。再睇近年北控水務業績良好，去年賺逾5億元，今年上半年已賺3.09億元，污水處理業務不斷壯大，建造服務業務所佔比例相對減少，有效拉升整體毛利率。

阿莊仲記得，今年初中央「一號文件」嘅「指導意見」全面加快水利改革，為整個產業帶來實實在在嘅政策刺激，預期喺下月宣布嘅一二年「一號文件」，也離不開農業相關政策，水利呢一瓣可能再次包括其中，加上通脹壓力回落，明年推進水價改革有望取得更大成果，橫睇豎睇，此股亦算係攻守兼備之選，若回落至2元邊，中長線值得考慮。